काठमाडौं– नेपाली काँग्रेसका जिल्ला सभापतिहरुले १३ औँ महाधिवेशन सम्पन्न भएको तीन महिनाभित्र पार्टीको विधान संशोधन गर्न माग गरेका छन् ।
महाधिवेशन बन्दसत्रको दोस्रो दिन शनिबार छलफलमा सहभागी जिल्ला सभापतिले पार्टीको सुदृढीकरण र नयाँ संविधानअनुसार विधान संशोधनको माग गरेका हुन् ।
तेह्थुम काँग्रेस सभापति गोविन्द ढुङ्गानाले केन्द्रले आफू अनुकूल नभइ सम्पूर्ण पार्टीको हितलाई ध्यानमा राखेर महाधिवेशन सम्पन्न भएको तीन महिनाभित्र विधान संशोधन गर्न माग गर्नुभयो ।
सुनसरी काँग्रेस सभापति राजिव कोइरालाले पार्टीको नीति तथा कार्यक्रम कर्मकाण्डी मात्र भएको गुनासो गर्दै सङ्घीयतामा जाने तर प्रदेश निर्माणमा अखण्डताको शैली अपनाउने पार्टीको विरोधाभाषपुर्ण नीति किन भनी नेतृत्वसँग प्रश्न गर्नुभयो ।
धादिङ काँग्रेस सभापति रमेश धमलाले मुलुकको आर्थिक सामाजिक रुपान्तरण गर्न पार्टीमा आमूल परिवर्तनको आवश्यकता रहेको बताउनुभयो ।
सबैभन्दा कान्छा सभापतिका रुपमा रहेका चितवन काँग्रेस सभापति जितनारायण श्रेष्ठले १२ औँ महाधिवेशनलाई एकताको महाधिवेशन भनेपनि त्यसको भोलिपल्टदेखि नै ६०/४० को भागबण्डा सुरु भएकोले त्यसलाई यस महाधिवेशनले अन्त्य गर्नुपर्ने बताउनुभयो ।
कास्की काँग्रेस सभापति कृष्ण केसीले पार्टीको नीति तथा कार्यक्रममा माओवादीको शसस्त्र द्वन्द्वमा मारिएका तथा पीडित काँगे्रस नेता कार्यकर्तालाई उचित सम्बोधन गर्नुपर्ने धारणा राख्नु भयो ।
तनहुँ काँग्रेस सभापति वैकुण्ठ न्यौपानेले पार्टीको सुदृढीकरणका लागि विधान संशोधन आवश्यक गरेको उल्लेख गर्दै उच्च शिक्षासम्बन्धी पार्टीको स्पष्ट नीति आउनुपर्ने विचार व्यक्त गर्नु भयो ।
स्याङ्जा सभापति कमल पङ्गेनीले मुलुकमा रोजगारीको अवसर सिर्जना गर्न जल, जङ्गल, जमिन र जवानी (युवा) को उचित परिचालनमा पार्टीले आवश्यक पहल गर्नुुपर्ने बताउनुभयो ।
गुल्मी सभापति भुवन श्रेष्ठ र मोरङ सभापति डिकबहादुर लिम्बूले क्रियाशील सदस्यता वितरणमा केन्द्रको हस्तक्षेप अन्त्य गर्नुपर्ने माग गर्नुभयो ।
बन्दसत्रमा शनिबार भाग लिएका जिल्ला सभापतिहरुले मञ्चमा न्यून सङ्ख्यामा केन्द्रीय पदाधिकारी तथा सदस्य उपस्थिति रहेकोमा आक्रोश पोख्नुभएको थियो । शनिबार बन्दसत्रको पहिलोसत्र सम्पन्न भएको छ भने महाधिवशेनका सहभागीले खाना खाएपछि दोस्रो सत्र सुरु हुने र शुक्रबार पेस भएका तीनवटै प्रतिवेदन पारित हुने बताइएको छ ।
भोलि फागुन २३ गते बिहान ८ बजेदेखि साँझ ४ बजेसम्म मतदान हुने तालिका छ ।
