टोकियो– हाँस्यप्रधान चलचित्र ‘वडा नम्बर ६’ जापानमा रिलिज गरिने भएको छ । अनाथ वालवालिकाको अध्ययनमा सहयोग गर्ने उद्देश्यले चलचित्र प्रदर्शन गर्न लागिएको हो ।
यहि फेब्रुअरी १४ मा मेगुरोस्थित मेगुरो कुमिन सेन्टरमा सफल चलचित्र वडा न ६ प्रदर्शन हुन लागेको हो ।
जापान मनि एक्सप्रेस (जेएमइ) को मुख्य प्रायोजन, एनआरएन जापानका सदस्य हरिचन्द्र लामाको समन्वय तथा निक्को जापानी ल्याङ्ग्वेज स्कुलको प्रायोजनमा हुन लागेको चलचित्र प्रदर्शनबाट संकलित रकम अनाथ वालवालिकाको शिक्षामा सहयोग र एनआरएन जापानले शुरू गरेको परोपकारी राहतकोष बिस्तार अभियानमा प्रयोग गरिने बताइएको छ ।
चलचित्र हेर्न जाने दर्शकहरुले अनाथ र आपतकालिन कोषको सहयोगको लागि २५ सय येन सहयोग तोकिएको एनआरएन जापानका सदस्य लामाले समुद्रपारिलाई जानकारी दिनुभयो ।
यस चिलचित्र गत असोज १ गतेबाट नेपालमा प्रदर्शन भएको थियो । चलचित्र दीपकराज गिरी, दिपाश्री निरौला तथा निर्मल शर्माले संयुक्त रुपमा बनाएका हुन । चलचित्रको निर्देशन उज्वल घिमिरेले गरेका हुन् भने चलचित्रमा दीपकराज गिरी, दयाहाङ राई, प्रियंका कार्की, जीतु नेपाल, केदार घिमिरे, सिताराम कट्टेल, विल्सन विक्रम राई, सन्दिप क्षेत्री लगायतका कलाकारको अभिनय रहेको छ ।
