सउल – मिति २०१२ अक्टुबर २१ तारिख दोंग्देमूनको लुम्बिनी रेष्टुरेन्टमा नेवाः पुचः दक्षिण कोरियाको दशैं रमझम कार्यक्रम सफलताका साथ सम्पन्न भयो | नेवाः पुचःका अध्यक्ष तथा गुरु नबिन बज्राचार्यले दशैं रमझम कार्यक्रममा सहभागी सम्पूर्ण नेपालीहरुलाई शुभ आशिषसहित मोहनी(ध्वाँसो) को टिका, रातो अक्षताको टिका लगाईदिएर दक्षिणा, फलफूल तथा जमरा दिएका थिए | तत्पश्चात विभिन्न मनोरन्जनात्मक सांगीतिक कार्यक्रमका साथ दशैं रमझम कार्यक्रम सम्पन्न भएको थियो |
कोरियाको ग्येओंग्जु सिटीमा २०१२ अक्टुबर १७ तारिख देखि १९ तारिखसम्म सम्पन्न भएको “२०१२ वर्ल्ड ग्रीन एनर्जी फोरम”मा नेपालको प्रतिनिधित्त्व गरी सो कार्यक्रममा भाग लिन आउनुभएका बिज्ञान तथा बातावरण प्रविधिमन्त्री डा. केशबरत्न शाक्यलाई नेवाः पुचःका अध्यक्ष गुरु नबिन बज्राचार्य, सल्लाहकार पुरु जोशी तथा सचिब निर्मल महर्जनले सउलको गिम्पो एरपोर्टमा स्वागत गरेका थिए | साथै नेपालको राजदूतावासमा नेवाःपुचः दक्षिण कोरियाका प्रतिनिधिहरु तथा उहाँ बीच आपसी हितका बिषयमा सरसल्लाह भयो | उहाँ २१ तारिख २ बजे कोसेपको योंघुंग स्थित पावर प्लान्टको भ्रमण गरेर दिउँसो नेपाल फर्कनु भएको थियो |
