काठमाडौं – अमेरिकाले सिरिया र इराकमा टर्कीले गरेको हवाई आक्रमणमा दर्जनौं कुर्द लडाकु मारिएको भन्दै गहिरो चिन्ता व्यक्त गरेको छ ।
इस्लामिक अतिवादी समुह आईएस विरुद्धको गठबन्धनसँगको समन्वय विना आक्रमण गरिएको भन्दै ह्वाइट हाउसले चिन्ता जनाएको हो ।
अमेरिका समर्थित कुर्द लडाकुको समूह वाईपीजीले आफ्नो आधार क्षेत्रमा आक्रमण भएको जनाएको छ ।
यो समूहलाई टर्कीले कुर्द पृथकतावादीसँग सम्बन्धित मान्दै आएको छ । कुर्द लडाकु इस्लामिक अतिवादी समुह आईएस विरुद्ध संघर्षरत छ ।
इराक सरकारले पनि आफ्नो मुलुकमा टर्कीले गरेको आक्रमणको निन्दा गरेको छ । टर्कीले भने आक्रमणबारे रुस र अमेरिकालाई जानकारी दिएको जनाएको छ ।
