काठमाडौं –चीन भ्रमणमा रहेका प्रधानमन्त्री पुष्पकमल दाहालले बेइजिङ फरेन स्टडिज युनिभर्सिटीले आयोजना गर्ने ‘नेपाल–चीन सम्बन्ध समृद्धिका अवसर विषयको छलफल कार्यक्रमलाई प्रमुख वक्ताका रुपमा आज सम्वोधन गर्दैहुनुहुन्छ ।
त्यसअघि प्रधानमन्त्री दाहालले विश्वविद्यालय परिसरमा स्थापना हुने नेपाल अध्ययन केन्द्रको उद्घाटन गर्ने कार्यक्रम छ । प्रधानमन्त्री दाहाले आजै चिनियाँ व्यवसायीसंग दुई मुलुकको व्यापारिक सम्भावना बारे छलफल समेत गर्नुहुने उहाँको निजी सचिवालयले जनाएको छ ।
चिनियाँ कम्युनिष्ट पार्टीका विदेश विभागका सदस्य एवं उच्च नेताहरुसंग प्रधानमन्त्री दाहालले आजै भेटवार्ता गर्ने कार्यक्रम छ । उहाँले भोली राष्ट्रपति सि जिनपिङ संग दुईपक्षीय सम्वन्धबारे महत्वपुर्ण भेटवार्ता गर्दैहुनुहुन्छ ।
यस्तै १५ गते प्रधानमन्त्री नेतृत्वको नेपाली प्रतिनिधिमण्डल चीनको स्वशासित क्षेत्र तिब्बतको ल्हासा पनि पुग्नेछ । त्यहाँ नेपाल र तिब्बत सरकारबीच स्थानीय तहमा विद्यमान द्विपक्षीय संयन्त्र थप क्रियाशील बनाउने विषयमा केन्द्रित रहेर तिब्बत सरकारका नेतासँग छलफल हुने बताइएको छ ।
प्रधानमन्त्री दाहाल यही चैत १६ गते स्वदेश फर्कनुहुनेछ ।