काठमाडौं – नेपाल टेलिकमले पछिल्लो समयमा विकसित प्रविधि चौथो पुस्ता (फोरजी) मोवाइल सेवा आजदेखि सञ्चालनमा ल्याउँदैछ । टेलिकमले आज आइतबारदेखि ताररहित थ्रीजीको विकसित प्रविधि फोरजी सञ्चालनमा ल्याउन लागेको हो । 
अहिले चलिरहेको भन्दा दु्रतगतिको मोबाइल डाटा इन्टरनेट सुविधा दिने फोर जी सेवा आइतबारदेखि काठमाडौं उपत्यका र पोखरामा शुरु हुन लागेको हो । हालको थ्रीजीको तुलनामा फोरजी सेवा ५ गुणा बढी दु्रतगतिमा सञ्चालन हुने टेलिकमको दाबी छ । फोरजी प्रयोगबाट द्रुतगतिमा इन्टरनेट सेवा, भिडियो कलका अतिरिक्त ठुला फाइलहरु अपलोड र डाउनलोड गर्न सहज हुनेछ । विश्व बजारमा फोरजी सेवा ७ वर्षअघिदेखि सुरु भएको हो । विकसित मुलुकमा सन् २०१० देखि यो प्रविधि सञ्चालनमा आएको हो । ७ वर्षपछि नेपाल टेलिकमले यसलाई सञ्चालनमा ल्याउँदैछ ।
निजी क्षेत्रको बहुराष्टिय मोवाइल सेवा प्रदायक एनसेलले भने नेपाल दुरसञ्चार प्राधिकरणबाट फोरजी सेवा सञ्चालनको अनुमति पाएको छैन । टेलिकमले पहिलो चरणमा ३ लाखलाई फोरजी सेवा दिने भएको छ । सुरुमा ३२.४ एमबीपीएस डाटा क्षमताको फोरजी सेवा सञ्चालन गर्नेछ । पछि यसलाई विस्तार गरेर ७५ एमबीपीएससम्म पुर्याउने तयारी टेलिकमको छ । टेलिकमले वितरण गरेको पुराना सिममा फोरजी नचल्ने जनाएको छ ।
पछिल्लो समयमा प्रयोगमा आएका युनिभर्सल सीमबाट मात्र फोरजी सेवा सञ्चालन हुनेछ । थ्रीजीको तुलनामा दु्रत गतिमा सञ्चालन हुने भएकाले यसको महशुल दर केही बढी हुने भए पनि अहिले तय नभएको टेलिकमले जनाएको छ । थ्रीजीको तुलनामा फोरजीको शुल्क केही महंगो हुनेछ । हाल टेलिकमले थ्रीजीको महशुल दर प्रतिएमबी १ रुपैयाँ लिदै आएको छ ।
