काठमाडौं – आर्यन सिग्देल र नम्रता श्रेष्ठ ‘एनएफडिसी राष्ट्रिय चलचित्र पुरस्कार–२०७२’ का सर्वोत्कृष्ट अभिनेता/अभिनेत्री घोषित भएका छन् ।आइतबार भएको पुरस्कार वितरण कार्यक्रममा पशुपतिप्रसादले २०७२ को सर्वोत्कृष्ट चलचित्रको अवार्ड जित्यो । त्यस्तै चलचित्र ‘क्लासिक’बाट दिनेश राउत सर्वोत्कृष्ट निर्देशक घोषित भए ।
त्यसैगरी उत्कृष्ट सहअभिनेता ‘रेशम फिलिली’बाट कामेश्वर चौरसिया र सहअभिनेत्री ‘अर्धकट्टी’बाट अशिष्मा नकर्मी’ घोषित भए । नवअभिनेतामा ‘होस्टेल रिटन्र्स’बाट सुशील सिटौला तथा नवअभिनेत्रीमा ड्रिम्सबाट साम्राज्ञी राज्यलक्ष्मी शाह उत्कृष्ट भए । वर्षको सर्वोत्कृष्ट व्यावसायिक चलचित्रको पुरस्कार भुवन केसीको ‘ड्रिम्स’ हुँदा त्यसैका नायक अनमोल केसी निर्णायकका तर्फबाट सर्वोत्कृष्ट अभिनेता छानिनुभयो । त्यस्तै सङ्गीतकार अर्जुन पोखरेल तथा पाश्र्व गायनमा अञ्जु पन्त सर्वोत्कृष्ट ठहरिए ।
विभिन्न २० विधामा पुरस्कार प्रदान गरिएको कार्यक्रममा डा. प्रदीप भट्टराईलाई सर्वोत्कृष्ट चलचित्र पत्रकारको पुरस्कार प्रदान गरियो । हरेक विधामा मनोनयनमा परेका पाँच जनाबाट सर्वोत्कृष्ट एक जना छनौट गरिएको थियो । त्यस्तै पुरस्कारको हरेक विधाको नामाकरण त्यही विधाका हस्तीका नामबाट गरिएको थियो ।
नेपाल चलचित्र विकास कम्पनीसँगको सहकार्यमा ‘गोपीकृष्ण इन्टरटेन्मेन्ट’को आयोजनामा गएको वर्षदेखि हुँदै आएको पुरस्कारका विजेतालाई चलचित्र विकास बोर्डका अध्यक्ष राजकुमार राईलगायतले ‘अवार्ड’ प्रदान गर्नुभयो ।
