काठमाडौं- प्रधानसेनापति छत्रमान सिंह गुरुङले बुधबारबाट विदा लिएपछि नयाँ नेतृत्वमा बलाधिकृत रथी गौरवशमसेर राणा आएका छन् ।प्रधानसेनापति छत्रमानसिंह गुरुङ आफ्नो तीनबर्ष कार्यकाल सकिनु एक महिनाअगावै बिदामा बसेपछि बलाधिकृत रथी राणाले नेपाली सेनाको नेतृत्व गरेका हुन् । राणालाई प्रधानसेनापति गुरुङले बुधबार नै नेपाली सेनाको नेतृत्व हस्तान्तरण गर्नुका साथै आवश्यक बरबुझारथ गर्ने सैनिक जनसम्पर्क निर्देशनालयले जनाएको छ ।
सरकारले आगामी शुक्रबारदेखि राणालाई कायम मुकायम प्रधानसेनापतिको जिम्मेवारी दिने निर्णय गरे पनि भोलि सार्वजनिक बिदा परेकाले बुधबार नै राणालाई सैनिक नेतृत्व सुम्पन लागेका हुन । प्रधानसेनापति गुरुङले आगामी २४ भदौमा अनिवार्य अवकाश पाउँदै छन ।
सो अवधिसम्म कार्यवाहक जिम्मेवारी सम्हाल्ने र २४ भदौबाट राणाले प्रधानसेनापतिको औपचारीक कार्यभार सम्हाल्ने छन् । २०३१ सालमा सहायक सेनानी (सेकेन्ड लेफ्टिनेन्ट) बाट नेपाली सेनामा प्रवेश गरेका राणा गत वर्षमात्र रथीमा बढुवा भएका थिए ।
पाँच वर्षअघि उपरथीमा बढुवा भएपछि उनले पश्चिम पृतनापति र व्यवस्था तथा युद्धकार्य महानिर्देशकको जिम्मेवारी कुशलतापूर्वक निर्वाह गरेका थिए । राणाको बढुवापछि रिक्त रथीमा हाल व्यवस्था तथा युद्धकार्य महानिर्देशक उपरथी नेत्रबहादुर थापा बढुवा हुने भएका छन् । उनी नेपाली सेनाको इन्फेन्ट्रीतर्फका सबैभन्दा वरिष्ठ उपरथी हुन् ।
