काठमाडौं- नेकपा (एमाले)को पोलिटब्युरो बैठक आइतबार पनि जारी रहनेछ । बैठक शुक्रबारदेखि सुरु भएको हो ।प्रतिनिधि परिषद्को बैठक सुरु हुन जम्मा २६ दिन मात्र बाँकी रहँदा हुन लागेको पोलिटब्युरो बैठक प्रतिनिधि परिषद् बैठक व्यवस्थापनको तयारी, त्यसमा प्रस्तुत गर्न अध्यष झलनाथ खनालले तयार गरेको राजनीतिक प्रतिवेदन र समसामयिक राजनीतिक परिस्थितिमा केन्द्रित हुने नेकपा (एमाले)का सचिव युवराज ज्ञवालीले जानकारी दिनुभयो । ‘प्रतिनिधि परिषद् बैठकका लागि स्थायी समिति बैठकमा छलफल भइसकेकाले पोलिटब्युरोबाट समेत सुझाव लिने गरी अध्यक्ष झलनाथ खनालको राजनीतिक प्रतिवेदनमा छलफल केन्द्रित हुन्छ’- ज्ञवालीले भन्नुभयो ।
केन्द्रीय सङ्गठन विभागको बैठकले समेत पोलिटब्युरोमा पेस गर्न केही प्रस्तावहरू तयार गरेको बुझिएको छ, जसमा विभिन्न विभाग र अञ्चललाई पूर्णता दिने पहिलेदेखि नै थाँती रहेको विषय छ । स्थायी समितिमा प्रस्तुत अध्यक्षको राजनीतिक प्रस्तावलाई पार्टी सचिवालयले थप सुझाव दिई पोलिटब्युरोमा लैजाने निर्णय गरेको हो । यद्यपि, यसको अन्तिम रूप भने आगामी केन्द्रीय कमिटीले दिनेछ ।
