काठमाडौँ – उपाधि दावेदार मनाङ–मर्स्याङ्दी क्लबले संकटा क्लबसँग दिँउसो १ बजे प्रतिस्पर्धा गर्दा च्यासल युथ क्लब र न्युरोड टिम (एनआरटी) बीचको रोमाञ्चक खेल दिउँसो ४:४५ बजे हुनेछ । दुवै खेल त्रिपुरेश्वरस्थित दशरथ रंगशालामा हुनेछ ।
मनाङ संकटालाई पराजित गर्दै लिगमा लगातार तेस्रो जित निकाल्दै शीर्षस्थानमा उक्लने दाउमा हुनेछ । अन्जन विष्टको कप्तानीमा मैदान उत्रने मनाङसँग ओलावाले आफिज, एडेलाजा सोमिडे, दयानन्द सिंह, पुजन उपरकोटी, दिनेश राजवंशी, नितिन थापा, निशान लिम्बु, आदित्य चौधरी र विमल रानालगायतको खेलाडीको साथ रहेको छ ।
यता, संकटा पनि मनाङको अपराजित यात्रालाई टुंग्याउँदै लिगमा लगातार दोस्रो जितको खोजीमा हुनेछ । पहिलो खेलमा हिमालयन शेर्पासँग अंक बाँडेको संकटाले दोस्रो खेलमा फ्रेन्ड्समाथि २–१ को पूनरागमन जित रचेको थियो । टोलीसँग सरोज दाहाल, लक्ष्मण रुचाल, सुभास गुरुङ, जय गुरुङ, फोडे फोफाना र टम्पी अर्नेष्टलगायतका खेलाडी छन् । मनाङको दुई खेलबाट ६ अंक छ । संकटाको ४ अंक छ ।
अर्काे आइभोल्टेज खेलमा च्यासल र एनआरटी खेल्दा दुवै टोली जितको लक्ष्यमा मैदान उत्रनेछ । च्यासल दोस्रो जितको खोजीमा रहँदा एनआरटी लिगमा पहिलो जित निकाल्ने योजनामा हुनेछ । च्यासलको दुई खेलबाट ३ अंक छ । च्यासलसँग विराज महर्जन, कमल श्रेष्ठ, विकास मेराग्लिया, मोउसा अवांगा, रुमेश बर्ताैला, यान्निक केट्चा, अजित गुरुङ र राजीव लोप्चन रहेका छन् ।
उत्कृष्ट विदेशी फरवार्डको साथ पाएपनि एनआरटीले जितको स्वाद चाख्न पाएको छैन । स्टेफन विनोङ र मेसुके ओलुमोउ, एरिक विष्ट, रन्जन विष्ट, शिव गुरुङ, विक्रम धिमाल र वियक वियकको साथ रहेको छ । एनआरटीको १ अंक छ ।
