काठमाडौं- गणतन्त्र कार्यान्वयनपछि पूर्वराजा ज्ञानेन्द्र शाह सोमबार पहिलोपटक युरोप गएका छन् । उनी सोमबार अपराह्न कतार एयरको नियमित विमानबाट कतारको राजधानी दोहा पुगेका छन् । उनी एकदिन दोहा बस्ने कार्यक्रम रहेको छ । त्यसपछि उनी फ्रान्सको राजधानी पेरिस जाँदै छन् ।
शाह यसअघि चारपटक भारत गए पनि भारतबाहेक अर्को मुलुकमा भने गएका थिएनन् । पूर्वरानी कोमल भने गतवर्षको मंसिरमा छोरी प्रेरणाका साथ सिंगापुर गएकी थिइन् । पूर्वराजासँगै पूर्वरानी कोमल, छोरी प्रेरणा, पूर्वयुवराज्ञी हिमानी, हिमानीका दुई छोरी र एक छोरा तथा धीरेन्द्र तीन छोरीहरू दिलासा, सिताष्मा र पूजा पनि युरोप गएका छन् ।
यसैगरी, पूर्वराजाका एकजना निजी चिकित्सक, स्वकीय सचिव सागर तिमिल्सिना र पूर्वराजा र पूर्वरानीका अंगरक्षक पनि भ्रमणमा रहेका छन् । फ्रान्स भ्रमणका क्रममा उनी बेलायत र जर्मनीमा पनि जाने भएका छन् ।
पूर्वराजाले फ्रान्समा भारतीय र फ्रान्सका अधिकारीसँग भेट्ने कार्यक्रम रहेको छ । यसैगरी, बेलायतमा पूर्वरानीको स्वास्थ्य परीक्षण हुने भएको छ । दरबार हत्याकाण्डमा पूर्वरानीको शरीरमा लागेको छर्राका केही अंश अझै निकालिएको छैन । यसैगरी, पूर्वरानीको बायाँ कानमा समस्या रहेको छ ।
हिमानी ट्रस्टको कार्यक्रममा पूर्वराजपरिवार फ्रान्सतर्फ लागेको हो । त्यहाँ हिमानी ट्रस्टले एउटा कार्यक्रम राख्ने भएको छ । पूर्वराजा हिमानी ट्रस्टका संरक्षक हुन् भने दिलासा, पूजा र सिताष्मा हिमानी ट्रस्टका सदस्य हुन् ।
पूर्वराजपरिवार फ्रान्स गएपछि निर्मल निवास पूर्णरूपमा खाली भएको छ । पूर्वयुवराज भने बैंककमा बस्दै आएका छन् ।
