काठमाडौं महानगरपालिकाका मेयर र उपमेयरलाई भाडा कै घरमा स्वागत गरिने

काठमाडौं – समृद्ध राजधानीको सपना बोकेर आउन लागेका मेयर र उपमेयरलाई काठमाडौं महानगरले भाडाको घरमा स्वागत गर्ने भएको छ ।

पुरानो भवन भुइँचालोले क्षतिग्रस्त भएपछि महानगरपालिकाको कार्यालय सुन्धारास्थित जेडिए (जगदम्बा) कम्प्लेक्सको पाँचौं र छैठौं तलामा सञ्चालन हुँदै आएको छ ।

कार्यकारी अधिकृत ईश्वरराज पौडेल बस्दै आएको कोठा मेयरका लागि खाली हुने भएको छ । प्रवक्ता ज्ञानेन्द्र कार्की बस्दै आएको कोठामा उपमेयर बस्नुहुनेछ ।

मेयर र उपमेयरका लागि तयारी गरिएका दुवै कोठा छैटौं तलामा छन् तर लिफ्ट कहिले चल्छ, कहिले चल्दैन । सर्वसाधारण जनताले मेयर र उपमेयरलाई भेट्नुपरेमा सकस नै हुनेछ ।

महानगरपालिकाका प्रवक्ता ज्ञानेन्द्र कार्कीले मेयर तथा उपमेयरका लागि भाडाकै कोठा तयार गरिएको बताउनुभयो ।