समाचार सुन्नुहोस :
काठमाडौँ – इजरायल र गाजाबीच युद्धविराम तथा बन्धक आदानप्रदान सम्झौता आजदेखि कार्यान्वयनमा आउने भएको छ। तर, इजरायली प्रधानमन्त्री बेन्जामिन नेतान्याहूले युद्धविराम अस्थायी मात्र रहेको बताउँदै, सम्झौता असफल भए हमासविरुद्ध कारबाही पुनः सुरु गर्ने चेतावनी दिएका छन्।
नेतान्याहूले टेलिभिजन सम्बोधनमार्फत युद्धविरामको आवश्यकताको पक्षमा रहेको जनाए पनि इजरायलले गाजामा आक्रमण गर्ने अधिकार सुरक्षित राख्ने बताएका छन्। उनले मध्य पूर्वमा इजरायली सेनाको सफलताका कारण हमास एक्लो परेको दाबी गर्दै पछिल्लो १५ महिनामा उल्लेखनीय उपलब्धि हासिल भएको पनि उल्लेख गरे।
हमासले इजरायली बन्धकहरूको सूची प्रकाशित गरेपछि मात्रै सम्झौता लागू हुने नेतान्याहूले प्रष्ट पारेका छन्। उता, हमासले इजरायली हवाई आक्रमणमा पछिल्लो तीन दिनमा गाजामा १२० जनाको मृत्यु भएको आरोप लगाएको छ। सम्झौताको पहिलो चरणअन्तर्गत इजरायलले ३३ बन्धकको बदलामा १,८९० प्यालेस्टिनी कैदीहरू रिहा गर्नेछ। दोस्रो चरणमा इजरायली सेना क्रमशः गाजाबाट फिर्ता हुनेछ भने अन्तिम चरणमा गाजाको पुनर्निर्माण कार्य अगाडि बढाइनेछ।
