पाँच महिनामा ६ खर्ब ४० अर्ब रेमिट्यान्स भित्रियो

समाचार सुन्नुहोस : 

काठमाडौँ – चालु आर्थिक वर्षको पहिलो पाँच महिनामा नेपालमा ६ खर्ब ४० अर्ब ४३ करोड रुपैयाँ बराबरको रेमिट्यान्स भित्रिएको छ।नेपाल राष्ट्र बैंकका अनुसार साउनदेखि मंसिरसम्मको यो रेमिट्यान्स आप्रवाह अघिल्लो वर्षको तुलनामा ४.४ प्रतिशतले वृद्धि भएको छ। गत वर्षको सोही अवधिमा विप्रेषण आप्रवाह २४.२ प्रतिशतले बढेको थियो।

अमेरिकी डलरमा विप्रेषण २.५ प्रतिशतले बढेर ४ अर्ब ७३ करोड पुगेको छ, जसको वृद्धिदर अघिल्लो वर्ष २१.१ प्रतिशत थियो। यस अवधिमा, खुद द्वितीय आय (खुद ट्रान्सफर) ६९९ अर्ब ३४ करोड पुगेको छ, जुन अघिल्लो वर्ष ६६९ अर्ब ७७ करोड थियो।

वैदेशिक रोजगारीका लागि अन्तिम श्रम स्वीकृति लिने नेपालीको संख्या १ लाख ९० हजार ३८४ र पुनः श्रम स्वीकृति लिनेको संख्या १ लाख ३५ हजार ४२५ रहेको छ। अघिल्लो वर्ष यो संख्या क्रमशः १ लाख ७१ हजार ९७५ र १ लाख २ हजार ५४२ थियो।