समाचार सुन्नुहोस :
काठमाडौँ – पश्चिमी वायुको हल्का प्रभावका कारण गण्डकी र कर्णाली प्रदेशका पहाडी तथा हिमाली क्षेत्रमा आंशिक बदली देखिएको छ भने अन्य स्थानहरूको मौसम प्रस्ट छ। मौसम पूर्वानुमान महाशाखाका अनुसार तराई र उपत्यकाका धेरै स्थानमा बिहान हुस्सु र कुहिरो लागेको छ। जसले जनजीवनमा केही कठिनाइ सिर्जना गरेको छ। विशेषतः यातायात, हवाई सेवा र स्वास्थ्य क्षेत्रमा समस्या देखिएको छ।
दृश्यता कमजोर हुँदा सवारी साधन चलाउँदा सचेत रहन र हवाई उडान प्रभावित हुन सक्ने सम्भावना महाशाखाले जनाएको छ। दिउँसो मौसम सामान्य रहने भएकाले जरुरी कामहरू र दिउँसोनै गर्न सुझाव दिइएको छ। राति हिमाली क्षेत्रका केही भागमा आंशिक बदलीको सम्भावना छ। काठमाडौं उपत्यकाको आजको न्यूनतम तापक्रम ४.८ डिग्री सेल्सियस मापन गरिएको छ।
यो चिसोबाट बच्न विशेष गरी बालबालिका, ज्येष्ठ नागरिक र कमजोर स्वास्थ्य अवस्थाका व्यक्तिलाई न्यानो कपडा लगाउने, तातो पेय सेवन गर्ने र सावधानी अपनाउने सल्लाह दिइएको छ। चिसो हावा र कुहिरोका कारण दैनिक जीवन प्रभावित हुनसक्ने भएकाले आवश्यक तयारी गर्न मौसमविद्हरूले आग्रह गरेका छन्।
