टोकियो – जापानको चिवा क्षेत्रमा सामाजिक कार्यमा सक्रिय नेपालीहरूको संस्था ‘याचियो नेपाल’ अध्यक्षमा पुनः जय पौडेललाई चयन भएका छन् । संस्थाको प्रथम महाधिवेशनले अध्यक्षमा पौडेललाई दोहोर्याएको हो ।
संस्थाको महासचिवमा दिनेश पुरी, वरिष्ठ उपाध्यक्षमा डिलाराम सापकोटा, उपाध्यक्षमा रितेश सुवेदी, नवीन कुँवर र सचिवमा हुमाकान्त पराजुली चयन भएका छन् । कोषाध्यक्षमा महेश घिमिरे, सहकोषाध्यमा राज भण्डारी र मिलन पुन चयन भए । महिला संयोजकमा मनिषा पौडेललाई चयन गरेको नयाँ कार्यसमितिले प्रवक्तामा सन्तोष अधिकारीलाई निर्वाचित गरेको छ ।
महाधिवेशनका अवसरमा बोल्दै प्रमुख अतिथि एनआरएनए जापान चिवाका संयोजक समीर जंग खड्काले सामाजिक कार्यमा हातेमालो गर्दै अगाडी बढ्नु पर्नेमा जोड दिए । संस्था गठन गर्नुभन्दा पनि नेपालीहरूलाई सहयोग, संस्कृति जगेर्ना र आपसी भाइचाराको विकासमा काम गर्नु पर्नेमा उनको जोड् छ ।
नवनिर्वाचित अध्यक्ष पौडेलले अन्य सामाजिक संस्थाहरूसँग सहकार्य गर्दै अफ्ठेरोमा परेका नेपालीहरूलाई सहयोग गर्ने प्रतिबद्धता जनाएका छन् । आगामी दुई बर्से कार्यकालमा जापानमा रहने नेपालीहरूको समस्या र सहयोग गर्ने कार्यमा संस्थामा प्रमुख उद्देश्य रहने महासचिव दिनेश पुरीले बताए । सोही अवसरमा पुरानो कार्यसमिति विघटन, सम्मान र नयाँ कार्यसमिति पदाधिकारीहरूलाई सम्मान पनि गरिएको थियो ।
गत वर्ष स्थापित भएको सो संस्थाले नेपाली केन्द्रित विभिन्न कार्यहरू गर्दै आएको छ । नेपाली समुदायको पहिचान परिचय र परम्परा तथा संस्कृतिलाई जापानी बिचमा लैजाँदै खेलकुद एवं सांस्कृतिक गर्दै आएको सो संस्थाले अगामी दिनमा पनि सामाजिक कार्यलाई तीव्रता दिने जनाएको छ ।
