समाचार सुन्नुहोस :
काठमाडौँ – दैलेखको भैरवी गाउँपालिका–१ जलजले क्षेत्रमा ग्यासको भण्डार रहेको प्रारम्भिक संकेत फेला परेको छ। खानी तथा भूगर्भ विभागका अनुसार ४,०१३ मिटर गहिराइसम्म गरिएको ड्रिलिङको क्रममा ग्यासको सम्भावना देखिएको हो। शनिबार ड्रिलिङको काम सम्पन्न भएपछि नमुना निकालेर थप अनुसन्धानका लागि चीनको ल्याबमा पठाइएको छ।
गत वैशाख २३ गतेबाट सुरु भएको अन्तिम चरणको ड्रिलिङ मेसिनको प्रयोगले उक्त क्षेत्रमा पेट्रोलियम पदार्थ रहेको पत्ता लगाएको हो। परियोजनाका सिनियर जियोलोजिस्ट सुरेश श्रेष्ठले नमुनाको परीक्षणपछि ग्यासको मात्रा र यसको आर्थिक महत्त्वबारे निर्णय हुने जानकारी दिनुभयो। चीनको जिओलोजिकल सर्भे कम्पनीले यस क्षेत्रमा प्रारम्भिक अध्ययन गरेपछि सिएनपिसी इन्जिनियरिङले उत्खनन थालेको हो।
नेपाल सरकारले पेट्रोलियम अन्वेषणलाई २०८२ सम्म पूरा गर्ने योजना अघि सारेको छ। नेपाल र चीनबीच भएको सम्झौताअनुसार दुई अर्ब ४० करोड रुपियाँ खर्चेर २०७५ सालमा यो परियोजना सुरु गरिएको थियो। पहिलो चरणको ड्रिलिङ सकिएसँगै अब अर्को चरणको सम्झौता गरेर थप उत्खनन कार्य अघि बढाइने तयारी भइरहेको छ। ग्यासको व्यावसायिक सम्भाव्यता छिट्टै निर्धारण गरिनेछ।
