समाचार सुन्नुहोस :
काठमाडौँ – जल तथा मौसम विज्ञान विभागको मौसम पूर्वानुमान महाशाखाको वेबसाइट सोमबार ह्याक भएको छ। यसअघि निर्वाचन आयोग र सुदूरपश्चिम सरकारको वेबसाइट ह्याक गरेको ‘क्याप्टेनस्मोकर’ नामक समूहले यो ह्याकिङ गरेको जनाएको छ।
महाशाखाको वेबसाइट आइतबारसम्म सुचारु रहेको भए पनि सोमबार बिहान यसको नियन्त्रण ह्याकरको हातमा पुगेको सूचना अधिकारी दिनकर कायस्थले बताए। उनका अनुसार वेबसाइट पूरानो प्रविधिमा आधारित भएकाले सुरक्षा प्रणाली कमजोर भएको र त्यसकै फाइदा उठाएर ह्याक गरिएको हो। “नयाँ वेबसाइट निर्माण भइरहेको हुँदा धेरै महत्त्वपूर्ण डेटाबेस यसमा थिएनन्,” कायस्थले थपे।
वेबसाइटमा हाल पानीमा झोक्राइरहेको ब्ल्याक एन्ड ह्वाइट GIF देखिन्छ। त्यहाँ ह्याकर समूहले सीप्यान, एसएमपीटी र डेटाबेसमा पहुँच कायम भएको दाबी गर्दै आफ्ना टेलिग्राम च्यानलमा जोडिनका लागि हानिकारक लिंक राखेको देखिएको छ।
सूचना अधिकारी कायस्थले वेबसाइटको सुरक्षाका लागि विभागको आईटी टिम सक्रिय रहेको र छिटै पुनः सञ्चालनमा ल्याइने विश्वास व्यक्त गरे। साथै, ह्याक भएका वेबसाइटका हानिकारक लिंक क्लिक नगर्न सबैलाई सचेत गराइएको छ। विभागले आफ्नो डेटाबेस सुरक्षित रहेको र यसबाट कुनै ठूलो क्षति नपुगेको बताएको छ।
