काठमाडौं – दशैँ र तिहारजस्ता नेपालीहरूको प्रमुख चाडपर्वहरू सम्पन्न भएसँगै राजनीतिक दलहरूले मंसिर १६ गतेका लागि तय गरिएको स्थानीय तह उपनिर्वाचनको तयारीलाई तीव्रता दिएका छन् । स्थानीय तह निर्वाचनको साढे दुई वर्षपछि हुन लागेको उपनिर्वाचनमा आफ्नो शक्ति परीक्षणसमेत हुने भएकाले दलहरू उपनिर्वाचनको लागि सम्पूर्ण शक्ति लगाएर तयारीमा जुटेका हुन् ।
यो उपनिर्वाचन दलहरूको शक्ति परीक्षणका रूपमा लिइएको छ । यसपटक ४४ पदहरूका लागि उपनिर्वाचन हुनेछ, जहाँ प्रत्येक दलले आफ्नो पुरानो स्थान जोगाउने प्रयासमा सबै शक्ति लगाइरहेका छन् । उपनिर्वाचनमा नेपाली कांग्रेसका लागि विशेष चुनौती देखिएको छ । २०७९ सालमा सम्पन्न स्थानीय तहको निर्वाचनमा कांग्रेसले जितेका २५ पद विभिन्न कारणले रिक्त रहेको छ, जसलाई यो चुनावमा पुनः आफ्नो पक्षमा ल्याउनु कांग्रेसको प्रमुख लक्ष्य हुनेछ ।
यसअघि कांग्रेसले जितेका ओखलढुंगा र कैलाली जिल्ला समन्वय समिति प्रमुख, काठमाडौंको कीर्तिपुर नगरपालिका प्रमुख, जाजरकोटको नलगाड नगरपालिका उपप्रमुख, मोरङको ग्रामथान गाउँपालिकाका अध्यक्ष, दैलेखको महाबु गाउँपालिका अध्यक्ष, दोलखाको गौरीशंकर गाउँपालिकाका उपाध्यक्ष, बाजुराको स्वामीकार्तिक खापर गाउँपालिका उपाध्यक्ष पदका लागि उपनिर्वाचन हुँदै छ । ताप्लेजुङको सिरिजंङ्घा गाउँपालिका-३, तेह्रथुमको लालीगुराँस नगरपालिका-८, उदयपुरको त्रियुगा नगरपालिका-१२, उदयपुरको बेलका नगरपालिका-९, सप्तरीको डाक्नेश्वरी नगरपालिका-१ र डाक्नेश्वरी नगरपालिका-४ का वडाध्यक्ष यसअघि कांग्रेसले जितेको थियो ।
हाल रिक्त रहेका यी वडाध्यक्ष पदका लागि पनि उपनिर्वाचन हुँदै छ । यसअघि कांग्रेसले जितेका तर विभिन्न कारणले रिक्त बन्न पुगेका रौतहटको राजपुर नगरपालिका-६, कीर्तिपुर नगरपालिका-१, काठमाडौं महानगरपालिका-१६, नुवाकोटको ककनी गाउँपालिका-२, गुल्मीको मुसीकोट नगरपालिका-१, रोल्पाको रुन्टीगढी गाउँपालिका-४, बर्दियाको ठाकुरबाबा नगरपालिका-४, कपिलवस्तुको शुद्धोधन गाउँपालिका-१, रुकुम (पश्चिम)को सानीभेरी गाउँपालिका-५, डोटीको पूर्वीचौकी गाउँपालिका-६, कञ्चनपुरको भीमदत्त नगरपालिका-६ को वडाध्यक्ष पदमा पनि उपनिर्वाचन हुँदैछ । यी पदहरू पुनः जितेर कांग्रेसलाई आफ्नो प्रभाव कायम राख्न गाह्रो हुने देखिएको छ । किनकि यसपटक कांग्रेसले चुनावी तालमेल नगरी एक्लै चुनाव लड्ने निर्णय लिएको छ ।
यता, नेकपा एमालेले पनि यसपटक एक्लै चुनाव लड्ने नीति लिएको छ । सत्तारूढ गठबन्धनमा रहेका एमालेले पनि उपनिर्वाचनको तयारीलाई विशेष महत्त्व दिएको छ । अघिल्लो निर्वाचनमा एमालेले जितेका नौ स्थानहरूमा यसपालि उपनिर्वाचन हुन लागेको छ । ती स्थानहरूमा झापाको कन्काई नगरपालिका-६, सुनसरीको गढी गाउँपालिका-६, ओखलढुंगाको मोलुङ गाउँपालिका-३, धनुषाको धनुषाधाम नगरपालिका-१, रौतहटको ईशनाथ नगरपालिका-७, गोरखाको गोरखा नगरपालिका-५, दैलेखको दुल्लु नगरपालिका-१३, डोल्पाको त्रिपुरासुन्दरी नगरपालिका-५ र बझाङको सूर्मा गाउँपालिका-४ रहेका छन् । यी पदहरूमा जित निकाल्न एमालेले आफ्नो सम्पूर्ण शक्ति प्रयोग गर्ने रणनीति लिएको छ ।
माओवादी केन्द्रका लागि पनि यो उपनिर्वाचन आफ्ना पुराना पदहरू जोगाउन महत्त्वपूर्ण छ । यसअघि माओवादी केन्द्रले जितेका महोत्तरीको रामगोपालपुर नगरपालिका-२, मकवानपुरको हेटौँडा उपमहानगरपालिका- १२, पुथा उत्तरगंगा गाउँपालिका-२, जाजरकोटको कुशे गाउँपालिका-७, कालिकोटको तिलागुफा नगरपालिका-४ र दार्चुलाको दुहुँ गाउँपालिका-५ को वडाध्यक्ष पदमा पनि उपनिर्वाचन हुँदै छ ।
जनता समाजवादी पार्टी (जसपा) नेपालले जितेको गढीमाई नगरपालिका-८ को वडाध्यक्ष र स्वतन्त्र उम्मेदवारले जितेको कीर्तिपुर नगरपालिका-४ को वडाध्यक्ष पदका लागि पनि अहिले उपनिर्वाचन हुँदैछ । यी पदहरूका लागि पनि ती दलहरूले आफ्नो पक्षमा वातावरण बनाउन प्रयास गरिरहेका छन् ।
मंसिर १६ को यो उपनिर्वाचनले प्रमुख राजनीतिक दलहरूका लागि आफ्नो पुराना पद जोगाउन र जनतामा आफ्नो शक्ति पुनः प्रमाणित गर्न महत्त्वपूर्ण अवसर प्रदान गर्नेछ । आगामी निर्वाचनको तैयारी र शक्ति सन्तुलनलाई लिएर दलहरूबीचको प्रतिस्पर्धा चर्को हुने देखिन्छ ।
