काठमाडौँ – नेपाली फिल्म ‘खुस्मा’ मा समावेश लोकशैलीको गीत ‘रुकुम मैकोट’ युट्युवको ग्लोबल ट्रेन्डिङमा डेढ महिनादेखि लगातार स्थान बनाइरहेको छ। असोज ६ गतेदेखि सूचीमा रहेको यो गीत हाल ८३ औं स्थानमा छ। एसडी योगीले संगीतबद्ध गरेको यस गीतलाई अहिलेसम्म ५ करोडभन्दा बढी पटक हेरिएको छ र यसले झण्डै ९ हजार सकारात्मक प्रतिक्रिया प्राप्त गरेको छ।
यो गीत टिकटक र रिल्समा पनि अत्यधिक लोकप्रिय छ। ‘रुकुम मैकोट’ असोजको पहिलो साता ग्लोबल ट्रेन्डिङमा ५९ औं स्थानमा थियो भने सुरुमा ७३ औं स्थानमा थियो। लोकलय र भावनात्मक शब्दका कारण यस गीतले दर्शकहरूको मन जित्न सफल भएको छ।
धीरज मगर र उपासनासिंह ठकुरी फिचर्ड यस गीतको भिडियोले विदेशी दर्शकहरूलाई समेत आकर्षित गरेको छ। यसअघि नेपाली गीत ‘कश्मिरे पछ्यौरी’ पनि दुई साता ग्लोबल ट्रेन्डिङमा रहेको थियो।
