काठमाडौं – पेरिस ओलम्पिकमा कुस्तीमा ५० किलो तौल समूहको फाइनलअघि अयोग्य करार भएपछि भारतीय कुस्तीबाज विनेश फोगाटले सन्न्यासको घोषणा गरेकी छिन् । सामाजिक सञ्जाल एक्समा एक पोस्ट गर्दै उनले कुस्तीलाई ‘अलबिदा’ भनेकी छिन् ।
विनेशले लेखेकी छिन्, ‘आमा, मलाई कुस्तीले जितेको छ, मैले हारेँ । माफ गर्नुहोला, तपाईंको सपना, मेरो हिम्मत सबै चकनाचुर भएको छ । अब योभन्दा धेरै तागत छैन ।’ फाइनलमै हार बेहोरे पनि उनले रजत जित्ने सुनौलो अवसर थियो । उनी ओलम्पिकको कुस्तीमा फाइनल पुग्ने पहिलो भारतीय खेलाडीसमेत हुन् ।
५० केजी समूहमा प्रतिस्पर्धा गरेकी विनेशको तौल नाटकीय रूपमा बुधबार बिहान एक सय ग्राम बढ्यो । जसका कारण अन्तर्राष्ट्रिय ओलम्पिक कमिटी (आईओसी) ले उनलाई ‘डिसक्वालिफाइड’ गर्नुपर्ने अवस्था आयो र उनी फाइनल खेल्न अयोग्य भएकी थिइन् । विनेशले अगाडि लेखेकी छिन्, ‘अलबिदा कुस्ती २००१-२०२४ । म तपाईंहरू सबैको ऋणी हुनेछु, माफी !’
