काठमाडौं – आइसीसी विश्वकप लिग २ अन्तर्गतको पहिलो सिरिजको अन्तिम खेलमा नेपालले नेदरल्याण्डलाई १७३ रनको मध्यम लक्ष्य दिएको छ । कीर्तिपुरस्थित त्रिवि क्रिकेट मैदानमा जारी खेलमा टस हारेर पहिला ब्याटिङ गरेको नेपाल ४९.३ ओभरमा १७२ रनमा अलआउट भयो ।
नेपालका लागि कुशल भुर्तेलले सर्वाधिक ६६ रनको योगदान गरे । उनले ९३ बलमा ८ चौकाको मद्दतले ६६ रनको अर्धशतकीय पारी खेले । यो उनको एक दिवसीय अन्तर्राष्ट्रिय क्रिकेटको आठौँ अर्धशतक रहेको छ । त्यस्तै नेपालका लागि करण केसीले २६ रन बनाउँदै आउट भए । आरिफ शेखले २२ रनको योगदान गर्दा आशिफ शेखले १७ तथा कप्तान रोहित पौडेलले १६ रन बनाए । नेपालका अन्य ब्याटरले दोहोरो अंकको रन बनाउन सकेनन् ।
नेदरल्याण्डका लागि भिभियन किंग्मा र आर्यन दत्तले समान तीन तीन विकेट लिए । बस डि लिडे दुई विकेट लिँदा रोइलफ भान डेर मेर्वाको नाममा एक विकेट रह्यो । नेपालले खेलेका तीन खेलमा एक खेलमा जित र दुई खेलमा पराजित भएको छ । नेपालले नामिबियासँगको दुवै खेलमा पराजित भएको थियो भने नेदरल्याण्डसँगको खेलमा जित निकालेको थियो ।
