काठमाडाैं – सरकारले ‘मिर्गौला प्रत्यारोपण गरेका, डायलाइसिस गरिरहेका, क्यान्सर रोगी र मेरुदण्ड पक्षाघातका बिरामीलाई औषधि उपचारबापत खर्च उपलब्ध गराउनेसम्बन्धी कार्यविधि, २०७८’ स्वीकृत गरेको छ । स्वीकृत कार्यविधिअनुसार अब यी रोगका बिरामीले औषधोपचार बापत मासिक रकम पाउने छन् ।
स्थानीय तहको समन्वयमा बिरामीले तीन/तीन महिनामा एकमुस्ट उपचारबापत मासिक पाँच हजार रुपैयाँका दरले भत्ता पाउने कार्यविधिमा उल्लेख छ । स्वास्थ्य तथा जनसङ्ख्या मन्त्रालयले जारी गरेको कार्यविधिमा मिर्गौला प्रत्यारोपण गरेका, डायलाइसिस गराइरहेका, क्यान्सर रोगी र मेरुदण्ड पक्षाघातका बिरामीलाई भत्ता पाउने सूचीमा राखिएको छ ।
भत्ता लिने प्रक्रिया के हुन्छ ?
कार्यविधिमा उल्लेख भएअनुसार यो भत्ता पाउन राष्ट्रिय परिचयपत्र नम्बर वा नागरिकता प्रमाणपत्रको प्रतिलिपि र नाबालकको हकमा जन्मदर्ता प्रमाणपत्रको प्रतिलिपि आवश्यक हुन्छ । चिकित्सकको सिफारिस, मेरुदण्ड पक्षाघातको हकमा अपांगतासम्बन्धी प्राप्त रातो वा निलो कार्डको प्रतिलिपि पनि सोही कागजातमा समावेश गर्नुपर्ने हुन्छ ।
यी सबै कागजातसहित आफ्नो वडा कार्यालयमा निवेदन दिनुपर्ने छ । वडा कार्यालयको सिफारिसमा बिरामीले पछिल्लो प्रत्येक तीन महिनामा मासिक पाँच हजारका दरले एकमुष्ट भत्ता रकम पाउनेछन् । बिरामीले पाउने रकम सम्बन्धित स्थानीय तहले बैंक खातामा पठाउने छ ।
हेर्नुहोस् कार्यविधि :-
