चार महिनापछि टेनिस स्टार ओसाकाको पुनरागमन

टाेकियाे – पूर्व विश्व नम्बर एक टेनिस खेलाडी नाओमी ओसाकाले चार महिनापछि कोर्डमा पुनरागमन गरेकी छन् । मेलबर्न समर सेटमार्फत पुनरागमन गर्दै जापानिज स्टारले पहिलो चरणमा जित पनि निकालेकी छन् ।

गएको सेप्टेम्बरमा युएस ओपनअन्तर्गत तेस्रो चरणमा लेला फर्नान्डेजसँग ५–७, ७–६ (७–२) ६–४ ले पराजित भएयता कोर्ड बाहिर रहेकी ओसाकाले आफू मानसिक दबाबमा रहेकाले केही समय आराम लिने बताएकी थिइन् ।

आफ्नो पुनरागमनलाई उत्कृष्ट बनाउने लक्ष्यमा रहेकी ओसाकाले फ्रान्सकी एलिज कर्नेटविरुद्ध ६–४, ३–६ र ६–३ को जित निकालेकी हुन् । ‘म त्यस्तो प्रकारको व्यक्ति हुँ जसले नतिजाको बारेमा कमै मात्र सोच्ने गर्छ’, उनले भनिन्, ‘मैले फेरि खेलमा रमाउने प्रयास गर्नुपर्छ किनकि म उपाधिका लागि खेलिरहेको छु ।’