विमान छुटेको भन्दै कर्मचारीलाई थप्पड हान्ने डाक्टर पक्राउ

टोकियो – विमान छुटेको विवादमा विमानस्थल कर्मचारीमाथि हातपात गरेको आरोपमा एक डाक्टर पक्राउ परेका छन् । टोकियोको हानेडा विमानस्थलको एक उडान छुटेपछि महिला ग्राउण्ड कर्मचारीमाथि हातपात गरेको आरोपमा ५८ वर्षीय डाक्टर पक्राउ परेका हुन् ।

प्रहरीका अनुसार कात्सुहिको फुकुदा नामका ती डाक्टरले सोमबार राति करिब ८ः१० बजे विमानस्थलको बोर्डिङ गेटमा आफूलाई उडानका लागि जानकारी नगराइएको भन्दै महिला कर्मचारीलाई दुई पटक थप्पड हानेका थिए । सिमाने प्रिफेक्चरको मत्सुए निवासी फुकुदालाई बुधबार अभियोगका लागि सार्वजनिक अभियोजक कार्यालयमा पठाइएको छ ।

तर, फुकुदाले अनुसन्धानका क्रममा आफूले कर्मचारीमाथि हातपात नगरेको दाबी गरेका छन् । ‘मैले उनलाई हानेको छैन,’ उनले भनेको स्रोतले जनाएको छ ।

Samudrapari.com is No. 1 Nepalese online News Portal based in Japan established in the year 2006.