काठमाडौं – चर्चित फुटबलर क्रिस्टियानो रोनाल्डो औपचारिक रुपमा अविवाहित हुन् । यद्यपि, उनी यसअघि नै चार सन्तानका पिता बनिसकेका छन् । ३६ वर्षीय रोनाल्डोले भाडाका युवती र आफ्नै प्रेमिकाबाट बच्चा जन्माएका हुन् ।
यसैबीच, म्यानचेस्टर युनाइटेडका सुपरस्टार रोनाल्डो फेरि जुम्ल्याहा सन्तानका बुवा बन्न लागेको विषय सार्वजनिक भएको छ । बिहीबार रोनाल्डोले आफ्नो इन्स्टाग्राममा तस्बिर राख्दै उनकी प्रेमिका जोर्जिना रोड्रिग्वेजले जुम्ल्याहा बच्चा पाउने जानकारी दिएका छन् । रोनाल्डो र जोर्जिना सन् २०१६ देखि सम्बन्धमा छन् ।
पोर्चुगल राष्ट्रिय टोलीका कप्तानसमेत रहेका रोनाल्डोले आफूहरू जुम्ल्याहा बच्चा पाउने आशामा रहेको बताएका छन् । तस्बिरमा रोनाल्डो र उनकी प्रेमिका जोर्जिना मुस्कुराइरहेका छन् । उनीहरुले सोनोग्राफी रिपोर्ट पनि देखाइरहेका छन् । जसमा जुम्ल्याहा बच्चा भएको देख्न सकिन्छ ।
रोनाल्डोका चार बच्चामध्ये ११ वर्षीय क्रिस्टियानो जुनियर सबभन्दा जेठा हुन् । उनी भाडाकी आमाबाट जनिमएका हुन् । रोनाल्डोले उनका छोराकी आमाको नाम हालसम्म पनि गोप्य नै राखेका छन् । त्यसैगरी, रोनाल्डोका चार वर्षका जुम्ल्याहा छोरी मारिया र छोरा मेटियो र तीन वर्षीया छोरी मार्टिना छन् ।
