काठमाडाैं – चीनले च्याङ्सी प्रान्तको गान्चो शहर र शनचन शहरलाई जोड्ने द्रुत गतिको नयाँ रेलवे सञ्जालको परीक्षण गर्न लागेको छ । बेइजिङ-हङकङ रेलवे सञ्जालअन्तर्गतको एक खण्डका रूपमा यो रेलमार्ग बनाइएको हो ।
यसको कुल लम्बाइ ४३६.७ किलोमिटर छ र यो ३५० किलोमिटर प्रतिघन्टाको अधिकतम गतिमा यात्रा गर्न सक्छ । यसै वर्षको अन्त्यसम्ममा यो रेलवे चल्न थाल्ने र दुई शहरबीचको यात्रा दूरी सात घन्टाबाट घटेर दुई घन्टामा झर्ने बताइएको छ ।
गान्चो शनचन द्रुत गतिको रेलवे चीनमा विकसित भइरहेको रेलवे सञ्जालको पछिल्लो उम्दा उदाहरण हो । चीनको द्रुत गतिको रेलवे सञ्जाल संसारकै सबभन्दा आधुनिक हो । जनगणतन्त्र चीन स्थापना हुँदा देशमा २२ हजार किलोमिटर लामो रेलवे मात्र थियो । अहिले ७० वर्षभन्दा बढी बितिसक्दा चीनले रेलवे निर्माणलाई अघि बढाइरहेको छ र रेलवे सञ्जालको गुणस्तरमा पनि वृद्धि गरेको छ ।
सन् २०२० को अन्त्यसम्म चीनको रेलवे सञ्जालको लम्बाइ १ लाख ४६ हजार किलोमिटर पुगेको छ । द्रुत गतिका रेलवेहरूको लम्बाइ ३८ हजार किलोमिटर छ । यो संसारकै उच्च गतिका रेलवेहरूको लम्बाइको दुईतिहाइ भाग हो ।
