पुल्चोककाे झडप नियन्त्रणमा खटिएका १८ प्रहरीमा कोरोना पुष्टि

काठमाडौं – विहिबार ललितपुरको पुल्चोकमा रातो मछिन्द्रनाथको रथ तान्ने क्रममा भएको झडप नियन्त्रणमा खटिएका १८ प्रहरीलाई कोरोना पुष्टि भएको छ ।

महानगरीय प्रहरी परिसर ललितपुरका अनुसार विहिबार खटिएका एक इन्स्पेक्टरसहित १८ जनामा कोरोना भाइरसको संक्रमण देखिएको हो । संक्रमण पुष्टि भएका १८ जना विहिबारको झडपमा खटिएको खुलासा भएको छ ।

केही दिनअघि पीसीआर परीक्षणका लागि उनीहरूकाे स्वाब संकलन गरिएकाे थियाे । शुक्रबार रिपाेर्ट पाेजेटिभ आएको हो ।

झडप नियन्त्रणमा खटिएका १८ जनासहित महानगरीय प्रहरी परिसर काठमाडौंका १५ जना, मेट्रोका ८ जना र ट्राफिक महाशाखाका १५ जनामा कोरोना संक्रमण पुष्टि भएको छ । विहिबार निषेधाज्ञा तोड्दै रथ तान्न खोजेपछि प्रहरीले रोक्न खोज्दा झडप भएको थियो ।