काठमाडौँ – टुँडिखेलमा साेमबार ६८ औँ प्रजातन्त्र दिवस मनाइएकाे छ । ६८औँ प्रजातन्त्र दिवसका अवसरमा राष्ट्रपति विद्यादेवी भण्डारी शहीदमञ्च टुँडिखेलमा आयोजित विशेष समारोहमा सहभागी हुनुभएको छ ।
समारोहमा उपराष्ट्रपति नन्दबहादुर पुन, प्रजातन्त्र दिवस मूल समारोह समितिका अध्यक्ष एवम् प्रधानमन्त्री केपी शर्मा ओली, प्रधान न्यायाधीश गोपाल पराजुली, मन्त्रीहरु एवम् संवैधानिक निकायका प्रमुखहरुको उपस्थिति छ ।
प्रजातन्त्र स्थापनाका लागि भएको सङ्घर्षमा शुक्रराज शास्त्री, दशरथ चन्द, धर्मभक्त माथेमा र गङ्गालाल श्रेष्ठले वि.स. १९९७ माघमा बलिदानी दिनुभएको थियो । प्रजा परिषद् नामक राजनीतिक दल भूमिगत रूपमा स्थापना गरी प्रजातन्त्र स्थापनाका लागि जनतामा जागरण ल्याएको अभियोगमा उहाँहरूलाई मृत्युदण्ड दिइएको थियो ।
जनताले आन्दोलन गरी रगत बगाएपछि १०४ वर्षीय जहाँनीया राणा शासकले जनतासमक्ष घुँडा टेकेको थियो । त्यसै दिनलाई सम्झना गर्दे फागुन ७ गते प्रजातन्त्र दिवस मनाउन थालिएको हो । तत्कालीन राजा त्रिभुवनको घोषणापछि राणा र नेपाली कांग्रेस सम्मिलित सरकार गठन भई नेपालमा प्रजातान्त्रिक शासनकालको सूत्रपात भयो ।
टुँडिखेलमा विषेश कार्यक्रम गरी सरकारले प्रत्यक फागुन ७ मा प्रजातन्त्र दिवस मनाउदै आएको छ ।
–तस्बिर रासस
