काठमाडौं – सरकारले यही महिना भित्र थप ६ जिल्लामा स्वास्थ्य बीमा कार्यक्रम विस्तार गर्ने भएको छ ।
भोजपुर, खोटाङ, रामेछाप, रुकुम पूर्व, रुकुम पश्चिम र महोत्तरीमा सरकारले बीमा कार्यक्रम विस्तार गर्न लागेको स्वास्थ्य मन्त्रालय अन्तर्गतको सामाजिक स्वास्थ्य सुरक्षा विकास समितिका कार्यकारी निर्देशक डा. गुणराज लोहनीले बताउनुभयो । योसँगै बीमा कार्यक्रम लागु हुने जिल्लाको संख्या २८ पुग्ने छ । बीमा कार्यक्रम सुरु गर्न ती जिल्लामा दर्ता प्रक्रिया लगायत तयारी भइरहेको डा. लोहनीले जानकारी दिनुभयो ।
सरकारले गत असोज महिनामा बर्दिया, सुर्खेत, रोल्पा, सिन्धुली, सोलुखुम्बु, झापा र सुनसरीमा कार्यक्रम विस्तार गरेको थियो । बाँकी जिल्लामा प्रत्येक तीनरतीन महिनाको अन्तरमा बीमा कार्यक्रम लैजाने समितिले जनाएको छ । सेवा लिनका लागि नागरिकले जिल्लास्थित सामाजिक स्वास्थ्य सुरक्षा विकास समितिमा सदस्य बन्नुपर्ने प्रावधान छ ।
सदस्य बनेपछि एउटा परिवारले एक वर्षका लागि २ हजार ५ सय रुपैयाँ बीमा शुल्क तिर्नुपर्छ । परिवार संख्या पाँच जना भन्दा बढी भए प्रतिव्यक्ति ४ सय २५ रुपैयाँका दरले बुझाइएको शुल्कबाट बिमितले बढीमा ५० हजार रुपैयाँ सम्मको औषधि उपचार सुविधा पाउने मन्त्रालयले जनाएको छ ।
