काठमाडौं – पाँच वर्षमुनिका बालबालिकालाई बुधबार र बिहीबार भिटामिन ए र जुकाको औषधि खुवाईंदैछ । सरकारको नियमित कार्यक्रम अनुसार २० वर्षदेखि भिटामिन ए को औषधि खुवाईंदै आइएको छ ।
६ महिनादेखि पाँच वर्षमुनिका बालबालिकालाई भिटामिन ए र दुई वर्षदेखि पाँच वर्षसम्मका बालबालिकालाई जुकाको औषधि खुवाइने स्वास्थ्य मन्त्रालयले जनाएको छ । भिटामिन ए को कमीका कारण लाग्ने रोगको रोकथामका लागि सरकारले २०५० सालदेखि नियमित रुपमा राष्ट्रिय भिटामिन ए कार्यक्रम र यो यसको केही वर्षपछि जुकाको औषधि पनि थप गरी सँगसँगै खुवाउन थालिएको छ ।
भिटामिन ए र जुकाको औषधि खुवाउन देशका सबै ठाउँमा महिला स्वास्थ्य स्वयंसेविकाहरुलाई खटाईएको स्वास्थ्य सेवा विभागले जनाएको छ । २०४०/४१ साल तिर गरिएको सर्वेक्षणले धेरैजसो बालबालिकामा रतन्धो देखिएपछि यो कार्यक्रम सञ्चालनमा ल्याइएको हो । यो कार्यक्रम सञ्चालनमा आएपछि बाल मृत्युदरमा कमी आएको विभागले जनाएको छ ।
भिटामिन ए ले शरीरमा रोग सँग लड्ने क्षमता बढाउँछ । यस्तै गाउँ घरमा पाइने ताजा हरियो सागपात र फलफूलबाट पनि प्रशस्त मात्रामा भिटामिन ए पाइने भएकाले यसको सन्तुलन मिलाएर खान डाक्टरको सल्लाह छ ।
