समाचार सुन्नुहोस :
काठमाडौँ – भाइरल बालकलाकार सचिन परियारको अन्त्येष्टि शुक्रबार पशुपतिमा रहेको विद्युतीय शव दाहगृहमा सम्पन्न भएको छ। हिजो नै दाहसंस्कारका लागि सचिनलाई पशुपति पुर्याइए पनि गाउँबाट उनका हजुरबुबालगायत आफन्त आउने प्रतीक्षामा दाहसंस्कार एक दिन पछि गरिएको थियो।
सचिनका बाबु तेजेन्द्र परियारले आफ्नो छोराको आँखा दान गर्ने इच्छा व्यक्त गरेका थिए। उनले “छोराको आँखा कसैले उपयोग गरून् र संसार हेरून्” भन्ने अभिलाषा राखेका थिए। तर, दानका लागि आएका स्वास्थ्यकर्मीले जाँच गर्दा सचिनको शरीरमा फैलिएको इन्फेक्सनका कारण उनको आँखा दान गर्न सम्भव नभएको निष्कर्ष निकालियो।
चिकित्सकका अनुसार सचिनलाई मस्तिष्कमा पानी जम्ने समस्या थियो, जसले गर्दा उनले ‘डाइबिटिज इन्सिपिडस’ नामक रोगबाट पनि पीडित बने। यसले उनको मिर्गौलाले अत्यधिक पिसाब उत्पादन गराउने, जसको कारण इन्फेक्सन फैलिएको थियो। स्वास्थ्य समस्याका कारण बालकको अल्पायुमै निधन भएको हो।
सचिनको दुःखद अवसानले धेरैलाई मर्माहित बनाएको छ। बाल्यकालमै संघर्षपूर्ण जीवन बिताएका सचिन सामाजिक सञ्जालमा निकै लोकप्रिय थिए। उनका योगदान र उनको संघर्ष सदैव सम्झना रहनेछ।
