बैतडी – उपक्षेत्रीय अस्पताल डडेल्धुराका डाक्टरले स्वास्थ्य सेवामा लापरवाही गर्ने गरेको बिरामीले बताएका छन् ।
बैतडीकी एक महिलाको पाठेघरको ट्यूमरको शल्यक्रिया गर्दा पाठेघरमै कपडाको टुक्रा छोडिएको भेटिएपछि बिरामीको आरोप प्रमाणित भएको छ ।
बैतडीको सिद्धपुरकी ३८ वर्षकी प्रतिभा भट्टको पाठेघरको ट्यूमरको शल्यक्रिया गर्दा उपक्षेत्रीय अस्पताल डडेल्धुराका डाक्टरले पाठेघरमै कपडाको चार टुक्रा छोडेको बिरामी भट्टका श्रीमान कमलापति भट्टले बताउनुभयो ।
गएको चैत १२ गते भट्टको उपक्षेत्रीय अस्पताल डडेल्धुरामा कार्यरत डा. नवराज जोशीले शल्यक्रिया गर्नुभएको थियो । शल्यक्रिया गरेको दुई÷तीन दिनमै बेस्सरी पेट दुख्ने, पेट फुल्ने, बेहोस हुने भएपछि फेरि जाँचका लागि उपक्षेत्रीय अस्पतालमा जाँदा सामान्य रहेको बताएको र दुखाई कम गर्ने सुई लगाएको उहाँले बताउनुभयो ।
पेटको दुखाई बढ्दै गएपछि बिरामीलाई कोहलपुर शिक्षण अस्पतालमा जाँच गराउँदा पाठेघरमै चार टुक्रा कपडा भेटिएको हो । कोहलपुर शिक्षण अस्पतालमा दोस्रो पटक शल्यक्रिया गरेर कपडाका टुक्रा झिकिएको र उपक्षेत्रीय अस्पतालका डाक्टरले गरेको गम्भीर त्रुटी फेला परेको भट्टले बताउनुभयो ।
अहिले बिरामी भट्टको अवस्था सामान्य रहेको छ । डाक्टरको चरम लापरवाहीले ठूलो समस्या निम्त्याएको भन्दै बिरामीका परिवार आक्रोशित भएका छन् । उनीहरुले लापरवाही गर्ने डाक्टरलाई कारवाही गर्न माग गरेका छन् । यस्तै क्षतिपूर्तिको माग पनि गरेका छन् ।
