काठमाडौं – निजी विमान कम्पनीले सोमबारदेखि दुर्गम बाहेकका रुटमा हवाई भाडा बढाएका छन् । निजी विमान कम्पनीले सुगम र पर्यटकीय रुटको हवाई भाडा सोमबारदेखि ३० प्रतिशतसम्म बढाएका हुन् ।
यसपटक सबैभन्दा धेरै काठमाडौं–धनगढी रूटको हवाई भाडा बढाइएको छ । १० हजार १ सय रुपैयाँ भाडा रहेको यो रुटमा २३ सय रुपैयाँ थप भई १२ हजार २ सय रुपैयाँ पु्र्याइएको छ । पुरानो भाडा दरमा पर्वतीय उडान (माउण्टेन फ्लाइट) को भाडामा सबैभन्दा धेरै २४ सय ७५ रुपैयाँ थपिएर ११ हजार रुपैयाँ पुगेको छ ।
त्यसैगरी काठमाडौंदेखि भद्रपुरमा १८ सय ७०, विराटनगरमा १६ सय ४५, जनकपुरमा ६ सय, सिमरामा ५ सय ६५, तुम्लिङ्गटारमा ९ सय ८५, भरतपुरमा ६ सय, भैरहवामा ११ सय ७०, पोखरामा ८ सय ९०, नेपालगंजमा २१ सय २५ रुपैयाँ भाडा थपिएको छ ।
त्यसैगरी पर्यटकीय रुट मानिने लुक्लामा १२ सय ४५ रुपैयाँ भाडा थपिएको छ भने पोखरादेखी जोमसोमको रुटमा ७ सय २५ रुपैयाँ थपिएको छ । नेपालगंजबाट पहाडी रुटहरु सिमिकोट, जुम्ला, मुगुको रारा, बाजुरा, डोल्पामा हुने दुर्गम हवाई भाडा भने पुरानै छ ।
त्यसैगरी काठमाडौं र विराटनगरबाट पूर्वी पहाडी रुटमा हुने हवाई सेवाको भाडा भने बढेको छैन । हरेक दुई वर्षमा हवाई भाडा पुनरावलोकन गर्ने शर्त अनुसार, यसपटक भाडा बढाउने सहमति दिइएको नागरिक उड्डयन प्राधिकरणका उपमहानिर्देशक राजन पोखरेलले बताउनुभयो ।
