दोहा – कतारमा मगर भाषा सम्बन्धि प्रशिक्षणसहित मगर भेला हालै सम्पन्न भएको छ ।
नेपाल प्रवासी मगर संघ दोहा कतारको आयोजनामा भएको सो भेलामा मगर भाषा लिपी र मगर ढुटको प्रशिक्षण दिईएको थियो ।
संघका अध्यक्ष भीमबहादुर तरामु मगरको अध्यक्षता र संघका केन्द्रिय समितिका प्रमुख सल्लाहकार देवबहादुर रानामगरको प्रमुख आतिथ्यता भएको सो भेला र भेला पश्चातको प्रशिक्षणमा उत्साहजनक मगर समुदायको सहभागिता रहेको थियो । संघका अध्यक्ष भीम तरामु मगर र अस्मित बुढामगरले प्रक्षिक्षकको भूमिका निर्बाह गर्नुभएको थियो भने बोर्ड, कलम र डस्टर अनि प्रशिक्षार्थीहरुलाई कापी र शिशाकलमको प्रायोजन समितिका कोषाध्यक्ष लिलाम्बर चिदी मगरले गर्नुभएको थियो ।
कतारमा रहेका मगरहरुको ब्यापक सहभागितामा गत सेप्टेम्बर २८ तारिखका दिन उक्त तेश्रो मगर भेला सम्पन्न भएको हो । उक्त भेलामा महासचिव शरण थापामगरको सञ्चालन रहेको थियो ।
कार्यक्रमको सभापति र प्रमुख अतिथिबाट संयुक्तरुपमा ब्यानर अनावरण गरी तीनवटा दिप प्रज्वलन गरेपछि औपचारिकरुपमा शुरु भएको उक्त कार्यक्रममा संघका प्रथम उपाध्यक्ष महेन्द्र थापामगरले स्वागत मन्तब्य राख्नुभएको थियो । यसैगरी अतिथिहरु प्रकाश आलेमगरले आदिवासी जनजातीहरुको बारेमा, मनिराज पुन मगरले कतारबासी नेपालीहरुको बारेमा र तिलक घर्तीमगरले मगरहरुको बारेमा बोल्नुभएको थियो । त्यसपछि प्रमुख अतिथि देवबहादुर रानामगरले शुभकामना मन्तव्य दिनुभएको थियो ।
