काठमाडौं – नेपालबाट फ्रान्स उडेका पूर्वराजा ज्ञानेन्द्र बेलायत गएर महारानी एलिजाबेथ द्वितीयालाई भेट्ने योजनामा छन् । हाल फ्रान्सतिर घुम्दै गरेका पूर्वराजा महारानीको समय पाए बेलायत जानेछन्, अन्यथा फ्रान्स नजिकका केही देश घुमेर दुई सातापछि फ़र्कने छन् ।हिमानी ट्रस्टले आयोजना गरेको कार्यक्रममा भाग लिन भन्दै फ्रान्स पुगेका पूर्वराजा ज्ञानेन्द्र शाहले बेलायतकी महारानीलाई भेट्ने समय पाउन प्रयास गरिरहेका छन् । बेलायती महारानीको स्वास्थ्य ठीक नभएको भन्दै उनका प्रतिनिधिहरूले ज्ञानेन्द्रलाई भेट निश्चित गरेका छैनन् । तर, महारानी एलिजाबेथ बिरामी भएको खबर बेलायत र संसारभरका कुनै पनि मिडियामा आएको छैन ।
पूर्वराजा फ्रान्समै रहेका वेला बेलायतकी महारानी एलिजाबेथका एक प्रतिनिधि र पूर्वराजा शाहबीच भेटवार्ता भएको स्रोतको भनाइ छ । नेपालका पूर्वराजालाई भेट्न बेलायती महारानीका प्रतिनिधि फ्रान्स पुगेका छन् । शुक्रबार पूर्वराजा बसेको रिज होटेलमा उनीहरूबीच भेट भएको छ । तर, ज्ञानेन्द्रको बेलायत भ्रमण अनिश्चित छ ।
यसपटक पूर्वराजाको युरोप भ्रमणको उद्देश्य युरोपियन मुलुकका अधिकारीसँगको भेट रहेको बताइएको छ । युरोपियन मुलुकका प्रतिनिधिहरू नेपालको पूर्वराजसंस्थाप्रति त्यति सकारात्मक नभएको पूर्वराजाका सहयोगीहरूको भनाइ छ ।
बेलायतकी महारानीलाई भेट्नुको उद्देश्य पनि राजसंस्थाप्रति बेलायतको भूमिका सकारात्मक बनाउन खोज्नु हो । पूर्वराजाले बेलायतकी महारानीलाई भेटे भने त्यहाँको परम्पराअनुसार बेलायतका प्रधानमन्त्रीले पनि भेट्नैपर्ने हुन्छ । प्रधानमन्त्रीले पूर्वराजालाई कुन हैसियतमा भेट्ने, यसको अझै टुंगो लागेको छैन ।
तर पूर्वराजाले आफ्नो सन्देश एलिजाबेथका प्रतिनिधिलाई दिइसकेका छन् । एलिजाबेथसँग ज्ञानेन्द्रका दाजु वीरेन्द्रको धेरैपटक भेट भइसकेको छ । त्यसैले नेपालको राजसंस्थाप्रति बेलायतकी महारानी चिरपरिचित छिन् । ज्ञानेन्द्रले पनि यसअघि बेलायतकी महारानीलाई भेटिसकेका छन् ।
फ़्रान्स जाने भनेपछि मात्र हिमानी ट्रस्टको कार्यक्रम त्यतै आयोजना गरिएको थियो । हिमानी ट्रस्टलाई आयोजक देखाएपछि हिमानी र उनका दुई छोरी र एक छोरालाई पनि सँगै लगिएको थियो । यही मौकामा हिमानी ट्रस्टका सदस्यहरू पूर्वराजकुमारी प्रेरणा र धीरेन्द्रका तीन छोरी पूजा, सीताष्मा र दिलासालाई पनि भ्रमणमा सँगै लगिएको छ । पूर्वराजाका स्वकीय सचिव सागर तिल्सिना पनि फ्रान्स गएका छन् ।
उनले जर्मनीलगायतका देशको पनि भ्रमण गर्नेछन् । त्यसक्रममा उनले युरोपियन युनियनका अरू अधिकारीसँग पनि भेट्नेछन् । पूर्वराजानिकट स्रोतका अनुसार फ्रान्समै केही भारतीय र केही चिनियाँ अधिकारीसँग पनि भेटघाट हुँदै छ । यही भ्रमणमा पूर्वरानीको स्वास्थ्य परीक्षण हुने भएको छ । उनको बायाँ कानमा समस्या छ ।
फ्रान्स पुग्नुअघि उनी कतारमा दुई रात बसेका थिए । कतारको राजधानी दोहामा पूर्वराजा बसेकै होटलमा उनलाई त्यहाँका अमिर हमाद विन खालिफा अल थानीका प्रतिनिधिले भेट गरेको स्रोतको भनाइ छ । उनी गत सोमबार राति ७:३५ कतार एअरवेजको नियमित उडानबाट दोहा पुगेका थिए ।
सोमबार राति करिब १२ बजे उनी दोहा पुगेका थिए । त्यो रातका लागि उनले दोहाको सार्क भिलेज एन्ड स्पा होटल बुक गरेका थिए । बुधबार उनी फ्रान्स पुगेका थिए । फ्रान्समा उनी रिज होटलमा बसेका छन् ।
पश्चिम नेपालका बुटवल, भैरहवा र रूपन्देहीलगायतका जिल्ला भ्रमण गरेपछि उनले युरोप भ्रमण गरेका हुन् । युरोप भ्रमणको कार्यक्रम भने बुटवल, भैरहवाको भ्रमणभन्दा पहिले नै तय गरिएको थियो ।
