भारतीय विदेश सचिव मथाइ नेपाल आउँदै

काठमाडौं- भारतीय विदेश सचिव रञ्जन मथाइ नेपालको तीनदिने भ्रमणको लागि शनिबार नेपाल आउँदै छन् ।

आइतबारदेखि सुरु हुने भारतीय विदेशमन्त्री प्रणव मुखर्जीको भ्रमणका एजेन्डा तय गर्न मथाइ नेपाल आउन लागेका हुन् । स्रोतका अनुसार आइतबार नै दुई मुलुकबीच दोहोरो कर हटाउने विषयमा सम्झौता हुने छ ।

मुखर्जीलाई भेटेर अर्थमन्त्री वर्षमान पुन आइतबारै दक्षिण कोरिया जाँदैछन् ।

यसैबीच कायममुकायम परराष्ट्र सचिव दुर्गाप्रसाद भटराई चीन भ्रमणमा रहेकाले निमित्त सचिव धनञ्जय झासँग भारतीय विदेश सचिवले भेटवार्ता गर्ने परराष्ट्र मन्त्रालयले जनाएको छ ।