काठमाडौं- देशबाट राजतन्त्र गुमेपछि पूर्वयुवराज्ञी हिमानी शाहले समाजसेवाका लागि खोलेको हिमानी ट्रष्ट यतिवेला निष्क्रियजस्तै बनेको छ । ट्रष्टले लामो समयदेखि कुनै पनि नयाँ कार्यक्रम ल्याउन सकेको छैन भने पुराना कार्यक्रमले पनि निरन्तरता पाएका छैनन् ।पारिवारिक तनावका कारण हिमानीले मन भएर पनि ट्रष्टका काममा ध्यान दिन नसकेको स्रोत बताउँछ । यद्यपि बैंककमा पारसलाई भेटेर फर्किएपछि उनी केही मात्रामा ‘रिफ्रेस’ बनेको र ट्रष्टलाई सक्रिय तुल्याउन खोजेको स्रोतको दाबी छ । बैंककबाट फर्केलगत्तै उनी ट्रष्टको कार्यालयमा गएर सहकर्मीसँग छलफल गरेकी थिइन् । तर, ट्रष्टलाई सक्रिय बनाउन कुनै पनि कार्यक्रम भने बनेका छैनन् ।
गत फागुनमा ट्रष्टको कार्यालय पुल्चोकबाट बालुवाटारस्थित आफ्नै भवनमा सरेको छ । तर, नयाँ कार्यालयमा खासै चहलपहल हँुदैन । ट्रष्टका पदाधिकारी आक्कलझुक्कल मात्र कार्यालय आउँछन् । चार कर्मचारी भने दिनदिनै आउने गरेका छन् । यद्यपि उनीहरूको काम फोन उठाउनु र गफिनु मात्र रहेको छ ।
हिमानीको परिवारबाहिरका दुई सदस्य पावना शाह र अर्चना शर्माले पनि पहिलेजस्तो उत्साह देखाएका छैनन् । पुल्चोकमा शाहकै घरमा हिमानी ट्रष्टको कार्यालय राखिएको थियो । उनले कार्यालयको भाडा लिन्नथिन् । ट्रष्टकी कानुनी सल्लाहकार अनिता केसी पनि सक्रिय छैनन् ।
हिमानी ट्रष्टका सात पदधिकारीमध्ये पाँचजना प्रेरणा, दिलासा, पूजा र सिताष्मा शाही परिवारकै सदस्य हुन् । ०६७ सालको घटस्थापनाको दिन पूर्वराजा ज्ञानेन्द्र शाहले हिमानी ट्रष्टको उद्घाटन गरेका थिए । शाह ट्रष्टका संरक्षक पनि हुन् । स्थापनायता ट्रष्टले समाजसेवाका केही कार्यक्रम गरेको छ ।
के–के गर्यो हिमानी ट्रष्टले ?
स्थापनाको सुरुमै ट्रष्टले दोलखाको नाम्दु गाविसमा एउटा स्कुल नै निर्माण गरेको थियो ।
यसैगरी दोलखाको तामाकोसी नदीस्थित पुलमा जाली बिछ्याउने काम पनि ट्रष्टले गरेको छ । हिमानी तीन–चारपटक दोलखाको नाम्दुमा पुगिसकेकी थिइन् । पैदलै पुगेकी उनले त्यहाँ पटक–पटक स्वास्थ्य शिविर चलाएकी थिइन् । गत वर्ष सिरहाको औरहीमा आगलागी हुँदा दुई सयभन्दा बढी घरमा टिन, बाँस र अन्य लत्ताकपडा प्रदान गर्ने काम पनि ट्रष्टले गरेको थियो । यसमा पनि हिमानीले आफैँ चासो राखेकी थिइन् ।
यसैगरी भक्तपुर, ललितपुर र काठमाडौंका दुई सयभन्दा बढी असहाय बालबालिकालाई साइकल वितरण गर्ने काम ट्रष्टले गरेको थियो । यसैगरी ट्रष्टकी अध्यक्ष शाह विभिन्न वृद्धाश्रममा गई वृद्धवृद्धालाई लत्ताकपडा, खानेकुरा बाँड्ने गर्थिन् । उनी आफ्नो जन्मदिन वृद्धवृद्धालाई खाद्यान्न र लत्ताकपडा वितरण गरेर मनाउने गर्थिन् । ट्रष्टको स्थापनाका लागि अध्यक्ष हिमानीले ५० लाख रुपैयाँ बैंकमा जम्मा गरेकी थिइन् । दोलखामा गरिएका कार्यक्रममा यही रकममध्येबाट खर्च व्यहोरिएको थियो ।
बोल्न चाहँदैनन् पदाधिकारी
हिमानी ट्रष्टका आगामी कार्यक्रमबारे ट्रष्टका पदाधिकारी केही बोल्न चाहँदैनन् । उनीहरू ट्रष्टले नयाँ कार्यक्रम ल्याउने सोचाइ बनाइरहेको मात्र बताउँछन् । खासगरी पूर्वयुवराज पारस स्वेदशमै हुँदा ट्रष्टको गतिविधि निकै बढेको थियो ।
हिमानीले एकपटक पारसलाई दोलखा पुर्याएकी थिइन् । स्रोतका अनुसार ट्रष्टको गतिविधिमा पारस आफैँले पनि हिमानीलाई सघाएका थिए, तर पारस बैंककमा बस्न थालेयता हिमानीमा समाजसेवामा रुचि विस्तारै घट्दै गएको छ । हिमानी बिरामी पारसलाई भेट्न बैंकक गएका वेला ट्रष्ट पूर्णरूपमा निष्क्रिय भएको थियो ।
नयाँ अधिकृतको नियुक्ति
हिमानीले नयाँ कार्यक्रमहरू सुरु गर्न हालै मात्र विजया राणा नाम गरेकी एकजना कार्यक्रम अधिकृत तथा कार्यालयसचिवको नियुक्ति गरेकी छिन् । नयाँ कार्यक्रमबारे राणाले प्रस्ताव तयार गरिरहेकी छिन् । हिमानी ट्रष्टको वेबसाइटमा नाम्दुका दश स्कुललाई शैक्षिक सामग्री तथा कक्षाकोठा निर्माणका लागि दातासँग सहयोगको याचना गरिएको छ । दातासँग सहकार्य गरेर जान ट्रष्ट तयार रहेको वेबसाइटमा जनाइएको छ । नाम्दुलाई नमुना गाविस बनाउने कार्यक्रमहरू सञ्चालन गरिरहेको पनि वेबसाइटमा जनाइएको छ ।
