समाचार सुन्नुहोस :
काठमाडौँ – नेकपा (एमाले)का विभिन्न तहमा क्रियाशील ५९ नेता–कार्यकर्ताले सामूहिक रूपमा पार्टी त्याग गरेका छन्। उनीहरूले अध्यक्ष केपी शर्मा ओलीको कार्यशैलीप्रति असन्तुष्टि व्यक्त गर्दै एमालेमा रहिरहन कुनै तुक नरहेको घोषणा गरेका छन्।
पार्टीका पूर्वउपाध्यक्ष भीम रावललाई निष्कासन गरिएको घटनाले ती नेता–कार्यकर्ताहरूलाई झनै रोषित बनाएको छ। उनीहरूले एक विज्ञप्तिमार्फत “पूर्वउपाध्यक्ष डा. भीम रावललाई २०८१ साल पुस १० गते सचिवालय बैठकमार्फत पार्टीबाट निष्कासन गर्नु निरंकुश, तानाशाही, र स्वेच्छाचारी निर्णय हो,” भनी आलोचना गरेका छन्।
पार्टी छाड्नेहरूले डा. भीम रावलको मातृभूमि जागरण अभियानलाई समर्थन र सहयोग गर्ने प्रतिबद्धता पनि जनाएका छन्। राजीनामा दिनेहरूमध्ये एमाले केन्द्रीय पर्यटन विभागका सदस्य रमेशबहादुर कुँवर र सुदूरपश्चिम प्रदेश कमिटी सदस्य चक्र रावलजस्ता नेताहरू छन्।
