पार्टीका कोशी प्रदेश सभापति थापामाथि भएको आक्रमणको काँग्रेसद्वारा निन्दा

समाचार सुन्नुहोस : 

काठमाडौँ – नेपाली कांग्रेसले पार्टीका कोशी प्रदेश सभापति एवं संसदीय दलका नेता, पूर्वमुख्यमन्त्री उद्धव थापामाथि केही व्यक्तिले शनिबार झापामा गरेको आक्रमणको निन्दा र भर्त्सना गरेको छ ।

नेपाल प्रेस युनियन झापाको कार्यक्रमबाट फर्कंदै गर्दा कनकाई नगरपालिकाको सुरुङ्गा नजिक उनीमाथि आक्रमण भएको थियो । कांग्रेसका अनुसार घटनामा थापाको निधारमा चोट लागेको छ। पार्टीका मुख्यसचिव कृष्णप्रसाद पौडेलले जारी गरेको विज्ञप्तिमा थापाको शीघ्र स्वास्थ्यलाभको कामना गरिएको छ। साथै, यस घटनाको गहिरो छानबिन गरी दोषीलाई कडा कानुनी कारबाही गर्न सरकारलाई आग्रह गरिएको छ।

कांग्रेसले यस्तो अराजकता र आपराधिक गतिविधिले सामाजिक शान्ति भंग गर्न सक्ने उल्लेख गर्दै घटनाको निष्पक्ष अनुसन्धानको आवश्यकता औँल्याएको छ।