टोकियो – तीजको माहौलले घरदेशदेखि परदेशसम्म तातिरहेका बेला जापानबाट अर्को तीज गीत सार्वजनिक भएको छ । जापानलाई कर्मथलो बनाउँदै आएका गायक गोकुल सापकोटाको तीजको कोसेली ‘रेल गुडे बटौली…’ बजारमा आएको हो ।
गोकुललाई स्वरमा गायिका समीक्षा अधिकारीले साथ दिएकी छन् । सूर्य खड्का युट्युब च्यानलमार्फत सार्वजनिक भएको गीतमा शब्द-संगीत बिशाल क्षेत्रीको रहेको छ । माया-प्रेममा रहेका जोडीको भावलाई सुन्दर ढंगबाट प्रस्तुत गरिएको गीतले चर्चा पाउने अपेक्षा गरिएको छ ।
यसपालीका तीजका गीतहरुमा उटपट्याङ र छाडा गीतको बाहुल्य बढ्दै गएको समयमा ‘रेल गुडे बटौली’ मार्फत मौलिक भाका र गीत संरक्षणको राम्रो प्रयास गरिएको जानकारहरुको भनाई छ । गीतका माध्यमबाट तीजको मौलिकता र मर्मलाई जोगाउन खोजिएको सर्जकको भनाई छ ।
जीवनकुमार ज्ञवालीले निर्देशन गरेको गीतको म्यूजिक भिडिओमा विजय पुन र स्मारिका ढकालको मुख्य अभिनय देख्न सकिन्छ ।
स्मरण रहोस् गीत र संगीतको उर्वरभूमि मानिदैं आएको जापानबाट यसपाली धमाधम तीजका गीतहरु सार्बजनिक भईरहेका छन् । जसमा सूर्य खड्का, युवराज आचार्य, प्रेम सापकोटा ‘सानु’, शिवा केसी, बिष्णु थापा मगर, समिना खड्का लोहनी, शान्ता जिसी, बिशाल क्षेत्री, निशा क्षेत्री ‘निशाना’, काजल गुरुङ लगायतका आवाज रहेको तीज गीत बजारमा आईसकेका छन् । यसैबीच गोकुल सापकोटाले ‘रेल गुडे बटौली…..’ तीजे गीत सार्बजनिक गरेका हुन् ।***
