काठमाडौँ – हाल कारागार जीवन बिताइरहेका अभिनेता पल शाहले बुधवार आफ्नो जन्मदिन मनाइरहेका छन् । जन्मदिनको अवसरमा उनलाई फ्यान एवं शुभचिन्तकहरुले शुभकामना दिइरहेका छन् । अभिनेता शाहले यसपटकको जन्मदिन तनहुँ जिल्ला कारागारभित्रै मनाउँदैछन् । कारागार प्रशासनले आफन्त र केही साथीभाइको उपस्थितिमा केक काटेर जन्मदिन मनाउन शाहलाई अनुमति पनि दिएको छ । अभिनेत्री पूजा शर्मा र निर्देशक शोभित बस्नेत तनहुँ कारागार पुगेर पललाई शुभकामना दिएका छन् ।
पल निकट मानिने उनीहरूले जन्मदिनको शुभकामना दिएका छन् । अभिनेत्री पूजाले केक लिएर पललाई भेट्न पुगेकी थिइन् । पूजाले फेसबुकमा केकको तस्वीर समेत सेयर गरेकी छिन् । पलले जबर्जस्ती करणीको मुद्दामा तनहुँ जिल्ला अदालतबाट सफाइ पाइसकेका छन् । उनले अहिले नवलपुर जिल्ला अदालतले बालयौन दुर्व्यवहारको मुद्दामा सुनाएको साढे दुई वर्ष जेल सजाय काटिरहेका छन् । नवलपुर अदालतको फैसला विरुद्ध पलले उच्च अदालत पोखरामा पुनरावेदन दिएका छन् । जसको सुनुवाइ यही फागुन १४ गते हुँदैछ ।
