मरिसस विरुद्ध नेपालको शानदार जित

काठमाडौँ – नेपालले अन्तर्राष्ट्रिय मैत्रीपूर्ण खेलमा ११ वर्षपछि जित निकालेको छ। नेपालले मैत्रीपूर्ण फूटबल प्रतियोगितामा मरिससलाई पराजित गरेको हो ।

दशरथ रङ्गशालामा शनिबार भएको खेलमा नेपाल १–० गोल अन्तरले विजयी भएको हो। नेपालका लागि विमल घर्तीमगरले ५५औं मिनेटमा निर्णायक गोल गरेका थिए।

चोटका कारण दुई वर्ष राष्ट्रिय टीमबाट बाहिर रहेका विमलले पुनरागमन गरेको पहिलो खेलमै गोल गरेका हुन्। उनले राष्ट्रिय टीमका लागि नौ गोल गरेका छन्।

नेपाल र मरिससबीच मंगलबार दोस्रो मैत्रीपूर्ण खेल हुनेछ।