काठमाडौँ – फिफाले गएराती दिएको ‘द वेस्ट २०२१’ को अवार्डमा क्रिस्टियानो रोनाल्डो र लियोनेल मेसीको भोटको खुलासा भएको छ । वर्षको उत्कृष्ट खेलाडीका लागि पोर्चुगलका कप्तान रहेका रोनाल्डोले विजेता रोबर्ट लेवानडोस्कीलाई भोट दिएका छन् भने मेसीले नेइमारलाई आफ्नो भोट दिएका छन् ।
मेसी र मोहम्मद सलाहलाई पछि पार्दै बायर्न म्युनिख र पोल्याण्डका स्टार लेवानडोस्कीले लगातार दोस्रो पटक फिफाको यो प्रतिष्ठित अवार्ड जितेका छन् । रोनाल्डोले आफ्नो पहिलो रोजाइमा लेवानडोस्कीलाई भोट दिएका थिए भने दोस्रो रोजाइमा चेल्सीका मिडफिल्डर एनगोलो कान्टे र तेस्रो रोजाइमा चेल्सीकै जर्जिन्होलाई दिएका थिए ।
त्यसैगरी मेसीले आफ्नो पहिलो रोजाइमा नेइमारलाई भोट दिए भने दोस्रो रोजाइमा पिएसजीकै किलीयन एम्बाप्पे र तेस्रो रोजाइमा रियल म्याड्रिडका करिम बेन्जमालाई भोट दिएको खुलेको छ । त्यसैगरी लेवानडोस्कीले भने आफ्नो पहिलो रोजाइको भोट चेल्सीका जोर्जिन्होलाई दिएका थिए भने दोस्रो रोजाइमा मेसी र तेस्रो रोजाइमा रोनाल्डोलाई भोट दिएका थिए ।
