काठमाडौँ – फुटबलको महाकुम्भका रुपमा चिनिने फिफा विश्वकप फुटबलको महत्व फुटबलप्रेमी बीच निकै छ । हरेक ४ वर्षमा दोहारिने यस फुटबल मेलाले विश्वलाई नै एकत्रित बनाउँछ । विगतको २१ वटा संस्करण धुमधामका साथ मनाउँदै गर्दा, विश्वभर फैलिएको कोभिड–१९ का कारण २२ औं संस्करणको माहोलले सबैको ध्यानाकर्षण गरेको छ ।
विभिन्न समयको अन्तरालमा कोभिड–१९ ले कहिले अल्फा त कहिले डेल्टा र अहिले ओमिक्रोनको स्वरुप लिएर जनजीवनलाई त्रसित बनाउँदै आएको छ । यसैबीच लाखौं मान्छे एकै देशमा आगमन हुँदा खेलको मनोरञ्जन लिन ज्यान धरापमा हुने स्थिति पो सिर्जना हुने हो कि भन्ने विश्व जगतमा चासोको विषय बन्न पुगेको छ ।
तर, फिफा विश्वकप फुटबलकोे आयोजक कतार भने विश्व स्वास्थ्य संगठन र फिफाको संयोजकत्वमा स्वास्थ्य मापदण्डलाई प्राथमिकता दिएर नै सञ्चालन गर्ने योजनामा रहेको छ ।
साथसाथै खेलाडी र दर्शकको समयलाई ध्यान पुर्याएर खेलकुद भेन्यु र होटलबीचको दूरी पनि ध्यान पुर्याएको सुप्रिम कमिटी फोर डेलिभरी एण्ड लेगेसीले जनाएको छ । पहिलोपटक मध्यपश्चिम देशमा हुन लागेकाले यसपटकको विश्वकपलाई अझै धेरै जिज्ञासाका साथ हेरिँदैछ ।
