मेस्सीबिनाको बार्सिलोनाको च्याम्पियन्स लिगमा अहिलेसम्मकै खराब सुरुवात

काठमाडौं — बेनफिकासँग पराजित हुँदै बार्सिलोनाले च्याम्पियन्स लिगमा हालसम्मकै सबैभन्दा खराब सुरुवात गरेको छ । पहिलो खेलमा बायर्न म्युनिखसँग ३–० गोलले पराजित भएको बार्सिलोना दोस्रो खेलमा पनि सोही गोलअन्तरले बेनफिकासँग पराजित भएको हो । पराजयसँगै बार्सिलोना अङ्कविहीन रहँदै समूह ई को पुछारमा सीमित बनेको छ ।

डार्विन नुनेजले खेलको तेस्रो मिनेटमा नै बेनफिकालाई अग्रता दिलाएका थिए । दोस्रो हाफमा राफा सिल्भाले अग्रता दोब्बर बनाए भने नुनेजले पेनाल्टीमार्फत व्यक्तिगत दोस्रो गोल गर्दै टोलीलाई सहज जित दिलाए । यता बार्सिलोना भने सन् २००३–०४ सिजनपछि पहिलोपटक प्रतियोगिताको नकआउट चरणमा नपुग्ने खतरा बढेको छ ।