डेब्यु खेलाडी चम्किदा बंगलादेशसँगमाथि नेपालको जित

काठमाडौं – नेपाली राष्ट्रिय महिला फुटबल टिमले पहिलो मैत्रीपूर्ण खेलमा बंगलादेशलाई पराजित गरेको छ । त्रिपुरेश्वरस्थित दशरथ रंगशालामा बिहीबार भएको खेलमा नेपालले बंगलादेशलाई २-१ गोल अन्तरले पराजित गरेको हो ।

नेपालको जितमा डेब्यु खेलाडी सबिता राना र प्रिती राईले एक/एक गोल गरिन् । बंगलादेशकी तोहुरा खातुनले एक गोल फर्काइन् । एएफसी महिला एसियन कप-२०२२ छनोटको तयारीका लागि नेपालले बंगलादेशसँग मैत्रीपूर्ण खेल खेलेको हो । दोस्रो मैत्रीपूर्ण आइतबार हुनेछ ।