पौडीका खेलाडी एलेक्स र मुख्य प्रशिक्षक कार्की जापान प्रस्थान

काठमाडौं – टोकियो ओलम्पिकमा सहभागी हुन पौडीका खेलाडी एलेक्जेन्डर साह (एलेक्स) र मुख्य प्रशिक्षक शंकर कार्की सोमबार जापान प्रस्थान गरेका छन् । पौडीमा सहभागी हुने अर्की खेलाडी गौरिका सिंह भने बेलायतबाटै जापान पुग्नेछिन् ।

जापान पुगेपछि पौडी टोलीले टोकुसिमामा तयारी गर्ने नेपाल ओलम्पिक कमिटी (एनओसी)ले जनाएको छ । नेपालबाट जाने खेलाडी र प्रशिक्षकलाई एनओसीले आइतबारै बिदाइ गरेको थियो । पौडी प्रतियोगिता साउन १२ र १३ गते हुनेछ ।

आगामी साउन ८ देखि २४ गतेसम्म हुने टोकियो ओलम्पिकमा ५ खेलाडीले प्रतिस्पर्धा गर्नेछन् । पौडी खेलाडी गौरिका र एलेक्ससहित एथलेटिक्सकी सरस्वती चौधरी, सुटिङकी कल्पना परिवार र जुडोकी सोनिया भट्ट पनि केही दिनमा जापान जानेछन् ।