काठमाडाैं – टोकियो ओलम्पिकका लागि एट्लेटिक खेलाडीको सहभागिताको विषयले अन्तिम समयमा आएर नाटकीय रुप लिएको छ । यसअघि म्याराथनका गोपिचन्द्र पार्कीले ओलम्पिकमा सहभागिता जनाउने बताइए पनि नेपाल ओलम्पिक कमिटीले बिहीबार विज्ञप्ति निकाल्दै उनको स्थानमा सरस्वती चौधरीले सहभागिता जनाउने बताएको छ ।
सरस्वतीले १०० मिटर दौडमा प्रतिस्पर्धा गर्नेछिन् । सरस्वतीले नियमित कोटाबाट नेपालको प्रतिनिधित्व गर्ने ओलम्पिक कमिटीले बताएको छ । गत वर्ष नेपालगन्ज म्याराथनको उपाधि जितपछि गोपिचन्द्र टोकियो ओलम्पिकका लागि छनोट भएको बताइएको थियो । त्यहीअनुरुप उनी प्रशिक्षण पनि गरिरहेका थिए ।
अन्तिम समयमा आएर विश्व एट्लेटिक्सको प्रविधिक कमिटीले नेपाललाई म्याराथनमा नभई महिला १०० मिटरको कोटा दिएपछि सरस्वतीको नाम पठाइएको ओलम्पिक कमिटीले बताएको छ । विभागीय टोली आर्मीकी सरस्वतीले कतारमा सम्पन्न विश्व एट्लेटिक्स च्याम्पियनसिपमा सहभागिता जनाएकी थिइन् । उनी आठौँ राष्ट्रिय खेलकुदमा १०० र २०० मिटर दौडको स्वर्ण विजेता खेलाडी पनि हुन् ।
जुलाई २३ देखि अगस्ट ८ सम्म जापानको टोकियोमा हुने ओलम्पिकमा नेपालका ५ खेलाडीले सहभागिता जनाउने पक्का भएको छ । सरस्वतीसहित पौडीबाट गौरिका सिंह र एलेक्स शाह, सुटिङकी कल्पना परियार र जुडोकी सोनिया भट्टले नेपालको प्रतिनिधित्व गर्नेछन् ।
