काठमाडौं — साविक विजेता पोर्चुगल युरोकप २०२० को प्रिक्वाटरफाइनलबाटै बाहिरिएको छ। आइतबार राती भएको खेलमा बेल्जियमले पोर्चुगललाई १–० गोलले हरायो।
बेल्जियमको जितमा थोर्गन हाजार्डले निर्णायक गोल गरे।
४२ औँ मिनेटमा थोर्गन हाजार्डले डिबक्स बाहिरबाट सेकेण्ड बार च्यापेर गरेको प्रहारमा गोल भएको थियो। गोलकर्ता थोर्गन बेल्जियमका कप्तान इडेन हाजार्डका भाई हुन्।
कप्तानसमेत रहेका क्रिस्टियानो रोनाल्डोको प्रेरणामा पोर्चुगल दोस्रो चरण पुगेको थियो। सर्वाधिक अन्तर्राष्ट्रिय गोल गर्ने एक्लो खेलाडी बन्न एक गोलले मात्र पछाडि रहेका रोनाल्डो यसपटक सफल हुन सकेनन्। उनले समूहगत चरणमा पाँच गोल गरेका थिए।
दोस्रो हाफमा लगातार आक्रमण गरेको पोर्चुगलविरुद्ध बेल्जियमका गोलकिपर थिबाउट कुर्तोइसले शानदार प्रदर्शन गरे। बेल्जियम फिफा वरियतामा हाल पहिलो नम्बरमा रहेको छ।
